04 Sep 2018 12:14

inkhel

US Open title humhim hi ka thupui ber a ni lo: Sloane

Sloane Stephens chuan kuminah US Open title humhim chu a tum ber a nih loh thu sawiin, ranking lama kaisan belh zel chu a duh ber a nih thu a sawi.

World number 3 Sloane Stephens hian nikum khan New York khawpuia US Open final khelhah American tho Madison Keys chu a hneh a, a vawi khatna atan Grand Slam title a la a. Kum 25-a upa Sloane hian Elise Mertens chu Pathianni khan Arthur Ashe Stadium-ah 6-3, 6-3 in a hneh a, quarter final-ah Anastasija Sevastova nen an inkhel dawn a ni.

2017 khan Sevastova nen hian quarter final-ah bawk an lo intawng tawh a, Stephens hi chakin a champion zui ta a. Kuminah hian title kawltu a nihna chuan a delh rit lem lo tih sawiin, thla 12 kalta khan a kalkawng a khirh em avangin kuminah chuan a ziaawm zawk daiha a hriat thu a sawi.

Sloane Stephens chuan, “Title humhim tih hi sawi dan dik lo niin ka hria a, a hmaa mi te vek kha tum leh ila, hneh leh vek ila, chu chu title humhim chu a ni thei ang a. Mahse, mi thar vek, ranking thar vek, seeding thar vek a ni a, thil a danglam em em mai a. Hei hi chu title humhim tih chi niin ka hre lo a ni,” a ti.

“Title humhim tih vel hi ka buaipui ber lo hle a, court chhungah theihtawp chhuah ila, a tam thei ang ber chak zel tum ila a pawimawh berin ka hria a. Khelh chhunzawm ngar ngar mai tur a ni a, ranking sang thei ang bera awm hi ka duhthusam chu a ni,” a ti bawk.

Stephens chuan, “Helai hmun ka rawn pan hian pathumna ka ni a, ka chungah hmun hnih chiah a awm tawh a. Hmabak chu a la ko viau a, mahse khati zat ka lo lawn chhoh theih chuan pahnih chauh lawn belh leh chu thil theih loh a ni hauh lo turah ka ngai,” a ti a ni.