US Open khelh mekah a hmawr bawk a ni tan tawh a, Women’s Singles final-ah 19 mi Bianca Andreescu chuan US Open-a vawi ruk lai champion tawh Serena Williams a hneha, a champion.
Seeded 15-na Andreescu hian Grand Slam title 23 la tawh Williams hi 6-3, 7-5 in a hneha, a vawi khat nan Grand Slam-ah Canadian nula hi a champion a ni.
Kum 19 a upa, Canadian nula Andreescu hi Serena Williams-i’n kum 1999 a US Open final a khelh khan a la piang lo!
Andreescu chuan US Open-a a champion hnuin, “Kumin hi ka tan chuan ka suangtuahna ram a takah rawn thleng a ni a, malsawmna ka dawng nasa em em a, lawmna tur hlirin a khat. Heti ang stage ropui tawhah, tennis legend Serena ka khelhpui thei hi a makin awih a har hle a ni,” a ti.
Kum 36 mi Williams hi Women’s Singles tennis-ah na na na chuan ani aia ropui chuang hi an awm lova, mahse tun hnaiah a zawnin final-ah vawi li a tlawmna a ni ta a, la tha hle mahse a chuai ve tan pawh a tih theih awm e.
Williams chuan Andreescu a hneh loh hnuin, “Bianca kha a khel tha em em a, a mah hi ka lawmpuiin ka chhuang em em bawka, tennis hmuhnawm tak a rawn chhawpchhuak,” a ti ve bawk.
Andreescu hi Canadian zinga Grand Slam singles title la thei hmasa ber a ni a, kum 2006-a Maria Sharapova-i’n US Open a lak hnua teenager Grand Slam la leh thei hmasa ber a ni bawk.