12 Sep 2015 04:42

Inkhel

Mizo Sports Website hmasa ber

​US Open : Serena a tla, Mipa final-ah Federer vs Djokovic

Zirtawpni zing khan khua a that loh avangin hmeichhe semi final khelh hun Inrinni zingah sawn a ni a, US Open 2015 final khel tur mipa leh hmeichhia kan hre ta.

Hmeichhe lamah Roberta Vinci leh Flavia Pennetta te chuan final an khel anga, mipa lamah Roger Federer leh Novak Djokovic te chuan final an khel ang.

Serena Williams chuan calendar Grand Slam beisei viau mahse Italian Roberta Vinci chu Flushing Meadows-ah a hneh ta tlat lo mai. World number 43 Roberta Vinci hi Grand Slam semi final a vawi khat khelhna a ni nghe nghe a, Serena Williams hi 2-6 6-4 6-4 in a hneh a ni.

Semi final pakhat zawkah Italian tho 26th seed Flavia Pennetta chuan Romanian second seed Simona Halep chu 6-1 6-3 in a hneh a, 1968 hnuah Grand Slam final-ah a vawi khat nan Italian ve ve final-ah Flavia Pennetta leh Roberta Vinci te an inhmachhawn dawn a ni.

Inkhelh zawhah Serena hian press conference pawh minute 4 lek a nei nghe nghe a, pawi a ti hle a, "Ka tan a pawi zia leh hrehawm ka tih zia hi ka sawi hleithei lo a ni. Pressure na tak ka hmachawn a, chak ngei ngei tura pressure a tir atangin ka dawng a ni," tiin a sawi.

Vinci chuan,"American mipuite chungah ngaihdam ka dil a, vawiin chu ka ni a inherchhuak a ni. Zing ka thawh hlim atang khan 'semi final ka khel dawn, hlim taka khelh ka duh, Serena chungchang ngaihtuah ka tum lo', ka ti a, chak kha ka beisei lo hrim hrim. Ka ngaihtuahnaah chuan tha taka khelh mai kha ka tum a nia," tiin a sawi.

Mipa lamah Roger Federer chuan 6-4 6-3 6-1 in Stan Wawrinka a hneh a, Federer hian set khat pawh hloh lovin final a thleng der mai, semi final-ah hian serve pawh vawi hnih chiah a drop nghe nghe a ni.

Kum 34 mi hian final-ah Champion lai Marin Cilic hnehtu top seed Djokovic a hmachhawn dawn a. Djokovic hian champion lai hi straight set 6-0 6-1 6-2 in a hneh nghe nghe a ni.

picture credit : AFP, AP, Reuters