03 Sep 2015 06:50

Inkhel

Mizo Sports Website hmasa ber

​US Open ni hnihnaah Murray leh Federer chak

Thawhtanni (Keini tan Thawhlehni zing) khan 2015 US Open tan a ni a, a ni khat niah Novak Djokovic, Serena Williams leh Rafael Nadal-te an chak a, a ni hnihnaah Britain Andy Murray chuan a khingpui Nick Kyrgios hnehin second round a lut ve ta.

Murray hi 3rd seed a ni a, a khingpui Australian Nick Kyrgios hi kum 20 mi chauh a ni a, Murray hian 7-5 6-3 4-6 6-1 in a hneh a, darkar hnih leh minute 43 lai kum 20 mi hneh turin kum 28 Murray hian hun a hmang a ni.

"Khua a uap lum em em a, a hautakin ka tlan hnem em em bawk.ka lo upa ve ta a, tunah chuan hahdam taka ka taksa chiah daih ka mamawh a ni," tiin Murray chuan an inkhelh zawhah a sawi. Murray hian second round-ah Frenchman Adrian Mannarino a hmachhawn dawn a ni.

Kum 20 mi Kyrgios hian Stan Wawrinka-a ngaihzawng chungchang ngaihthlak nuamlo taka a sawi hnuah hrem a ni a, khami hnua Grand Slam a khelh leh hmasak ber a ni. Player puitling a ni chho mek tih a lantir chiang hle, a talent a tha hle a, hrem a nih avang khan World number 37-ah a tlathla, tha taka a khel chho a nih chuan tennis star ropui tak a la ni ngei ang le.

Roger Federer pawhin Leonardo Mayer a hneh a, second seed Federer hian minute 77 chhung lekin Argentine Mayer hi 6-1 6-2 6-2 in a hneh a ni. Fifth seed Stan Wawrinka chuan 7-5 6-4 7-6 (8-6) in Albert Ramos a hneh a, Petra Kvitova pawhin second round a lut bawk a ni.

Women's second seed Simona Halep chuan Marina Erakovic a hneh a, Halep hian 6-2 3-0-a hma a hruai laiin Marina hi a inhnukdawk a ni.Lucie Safarova erawh a tla nghal hlauh mai, sixth seed and French Open runner-up hian 6-4 6-1 in Ukraine mi Lesia Tsurenko a hneh lo a ni. Fifth seed Kvitova chuan German qualifier Laura Siegmund chu 6-1 6-1 in a hneh bawk a ni.

picture credit : Getty & Reuters