US Open 2019 chu a hmawr bawk fel a ni ta a, Men’s Singles-ah Rafael Nadal champion-in a US Open title palina a la.
Final-ah Nadal hian fifth seed Daniil Medvedev a hmachhawna, US Open final kan hmuh tawh zawng zawnga la hmuhnawm ber zinga mi niin, darkar chuang zet an khelh hnuah Nadal hi 7-5, 6-3, 5-7, 4-6, 6-4 in a chaka, a Grand Slam title 19-na a la tling ta.
Kumin bakah kum 33 mi Nadal hi US Open-ah kum 2010, 2013 leh 2017-te khan a lo champion tawh. Kuminah Nadal hian French Open a la bawka, Novak Djokovic nen kumina Grand Slam pali awmte pahnih ve ve in an insem.
Sawi tawh angin Nadal hian Grand Slam title 19 zet a la taa, Men’s Singles-a Grand Slam la hnem ber dawttu niin Roger Federer chiah a pha lova, Federer hian Grand Slam 20 a la tawh thung.
Nadal leh Federer-te hi an in upat hleih angrenga, Federer hi la tha viau mahse a chuai tan ve tawh avangin rokhawlhna dang a awm a nih loh chuan Nadal hian a lehpelh mai ringtu hi tennis expert leh analyst-te zingah a awm tam zawk an ni a tih theih awm e.
Grand Slam hnuhnung 12-ah Nadal emaw Djokovic emaw Federer emaw te an la champion veka, anni pathum paihthla thei hi an la awm meuh lo a ni ber.