​US Open mipa final tur Djokovic leh Wawrinka

10th September 2016, 01:09PM

Champion lai Novak Djokovic chuan Gael Monfils chu 6-3 6-2 3-6 6-2 a hnehin US Open 2016 final a in hlangkai. Semifinal dangah Wawrinka chuan Kei Nishikori chu 4-6 7-5 6-4 6-2 in a hneh ve bawk a, finalah Wawrinka hian Djokovic a hmachhawn ang.

Djokovic hian final lut tur hian court chhungah darkar 6 leh minute 24 a hmang a. A hmachhawn tawhah pahnih chu hliam vangin an retire a pakhat walkover bawk a ni. Final thleng tur hiak court chhungah hun a hmang reilo hle.

Monfils hian set hnih a hloh tawh hnuin a game khelhdan thlakin drop shot a rawn hmang nasa a, hei vang hian set thumna a la ve leh ta a. Djokovic hian a dar vei lamah hliam a tuar a, hei hi Monfils tan hunremchang tak anga a lan laiin Monfils a fit tawk lova, set linaah hian Monfils hian ball thih lai apiangin a khup dawmin a kun deuh chhen a, a tha ti tho turin Coca-Cola a in phah hial. A tawpah erawh Djokovic zawk hian 6-2 in set linaah hian a hneh a ni.

Semifinal dangah Stan Wawrinka chuan Kei Nishikori a hneh ve bawk a. Andy Murray vawthlatu Nishikori hi set khatnaah a khel tha a 6-4 in a la hmasa a, set hnihnaah pawh ala khel pangai hle a mahse 5-7 a chaklo zawkah a tang a, hemi hnu hian a zuihral ta a ni.

Wawrinka chuan, "Kei kha khelhpui a hahthlak a, bul a tan tha hle bawk. Ka tan chuan game khelh rei pui a a chauh hun nghah kha hun remchang a ni a, a chauh deuh hnu khan ka bei let chiah a ni" tiin a sawi a. "Final ka lut hi a mak a ni" tiin a lawmzia a sawi bawk a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.