07 Sep 2019 08:29

bakteaJr.

Mizo tlangval

​US Open final-ah Nadal leh Medvedev

US Open 2019 chu a hmawr bawk a ni leh tep tawha, ngaihven hlawh ber Men’s Singles final-ah vawi thum champion Rafael Nadal chuan Russian mi Daniil Medvedev a hmachhawn dawn.

Nadal hian final lut tur hian semi-final ah Italian player Matteo Berrettini chu 7-6 (8-6), 6-4, 6-1 in a hneha, Medmedev hian final lut turin semi final-ah Grigor Dimitrov chu 7-6 (7-5), 6-4, 6-3 in a hneh ve bawk.

Thla hmaa neih Rogers Cup final-ah Nadal leh Medmedev-te hi an intum a, Nadal hian 6-3, 6-0 in hnehna a changa, US Open final-ah hian Medmedev chuan phuba lak a tum dawn.

Medmedev hi US Open series-ah a zawnin Final vawi li a luhna a ni taa, Washington-ah khan Kyrgios a hnehlo hlauh a, Rogers Cup final-ah Nadal a hnehlo a, Cincinnati Final-ah erawh Djokovic hnehin, US Open final a lut leh ta a ni.

Nadal hian Grand Slam 18 a la tawh a, Roger Federer chu pahnih chiahin a pha lo. A elpui ber thin pahnih Federer leh Novak Djokovic-te an tla tawha, final-ah a lo hneh tawh a tum dawn bawk nen Grand Slam 19-na a la lovang tih a sawi theih lova, US Open-ah a champion a nih ngat chuan Grand Slam lak tamah Federer a hnaih lehzual dawn hle a ni.

Women’s Singles final-ah hmeichhe tennis player awm tawh zawng zawnga ropui bera chhal ngam, US Open-a vawi ruk champion tawh Serena Williams kan hmu dawn a, ani hian final-ah hian Canadian mi Bianca Andreescu a hmachhawn dawn.

Williams hian kum 1999 khan US Open final hi a lo khel tawh a, kum 20 hnu zeta pawh US Open final khel leh dawnin, a tum tur Andreescu erawh hi kum 19 mi chauh a ni thung a ni.