17 Aug 2020 07:26

bakteaJr.

Mizo tlangval

​US Open atangin Halep a inhnukdawk ve leh ta

World number 2 ni lai Simona Halep chu US Open lo awm mai tawh tur atangin a inhnukdawk ve leh ta a, US Open khel lo tur an pun belh zel.

Romanian player Halep hi top 10 player atanga US Open khel lo tur parukna a ni a, US Open hi tun thla tawp August ni 31 atang hian New York-ah entu mipui awm lova khelh tur a ni.

US Open champion lai Bianca Andreescu leh world number 1 Ashleigh Barty-te pawh US Open atang hian an lo hnukdawk tawh bawka, US Open khel lo tur dang te hi Elina Svitolina, Kiki Bertens leh Belinda Bencic-te an ni.

Wimbledon champion lai kum 28 mi Halep chuan US Open atanga a inhnuhdawh thu sawiin, “Ka thutlukna siam reng rengah hian ka hriselna ka dah hmasa ber thina, kawng tinreng ka thlir kual hnuah leh kan dinhmun ka thlir hian zin ve loh ka thlang ta a ni,” a ti.

Top 10 atangin Serena Williams chuan US Open khelh ngei a tum hle a, kum 2018-a champion Naomi Osaka, Australian Open champion lai Sofia Kenin leh world number 3 Karolina Pliskova te chu top 10 player US Open atanga inhnukdawk ve lo te an ni.