Thawhtanni khan US Open tan a ni a, hmeichhe lama top seed Serena Williams, mipa eight seed Rafael Nadal leh World Number One Novak Djokovic te chuan an khingpui an hneh nghal.
Serena Williams hian a khingpui Vitalia Diatchenko chu darkar chanve chhung lekin a hneh a, 6-0 2-0 in Serena hian hma a hruai laiin Vitalia Diatchenko hi a inhnukdawk ta a ni.
Nadal chuan kum 18 mi Borna Coric chu 6-3 6-2 4-6 6-4 in a hneh a, World Number one Novak Djokovi chuan Brazilian Joao Souza chu 6-1 6-1 6-1 in a hneh a, hetih lai hian fourth seed Kei Nishikori erawh a chak lo hlauh mai. Nikuma runner up Kei Nishikori hian Frenchman Benoit Paire chu 6-4 3-6 4-6 7-6 (8-6) 6-4 in a hneh lo a ni.
Nishikori chuan,"First round-a chak loh hi a hrehawm ka ti em em thin, mahse ka khingpui kha a khel tha em em a ni. Kei pawh khel chhia ka inti bik lo a ni," tiin a sawi.
Nadal chuan set hnih a lak hnuah set thumna Croatia's Coric lakah a hloh a, mahse hnehna a chang ta tho a, Nadal chuan,"Bul ka tan tha hle, set hmasa pahnih kha chu keimah ro rovah ka khelh tha ber tum niin ka hria, mahse ka chau deuh a, kan inkhelhna kha a uap lutuk a, ka chesual teuh hle, player tha tak a ni a, a la tha dawn chauh a ni," tiin a khingpui chungchang a sawi.
Serbian seventh seed Ana Ivanovic pawh a chak zo lova, Ivanovic hian Slovakia nula Dominika Cibulkova chu 6-3 3-6 6-3 in a hneh lo a ni.
picture credit : Getty & Reuters