01 Sep 2018 12:30

inkhel

US Open: 2nd seed Caroline Wozniacki a tla

US Open khelh mekah world number 1 Simona Halep chu first round-ah a tla nghal a, a hnung zuiin second seed Caroline Wozniacki pawhin second round a paltlang thei ta lo.

World number 2 Caroline Wozniacki chu second round-ah world number 36 Lesia Tsurenko nen an inkhel a, Ukraine star Tsurenko hi 6-4, 6-2 in a chak a, Denmark star Wozniacki hian second round bak a pel thei ta lo a. Tun thla chhungin Wozniacki hi round tir lama a tlak vawi thumna a ni.

Kum 28-a upa Wozniacki chuan, “Lesia Tsurenko khan ka khelh dan tur ang tak zawkin a khel a, a chak zawk a nih theih phah ta a. Tun ang hun hi ka lo nghahhlelh ve ber thin lai a ni a, kum dangah chuan tun ang hun hi ka khelh that ve theih ber lai a ni thin a ni,” a ti.

4th seed leh US Open champion lo ni tawh Angelique Kerber chuan second round-ah Sweden mi Johanna Larsson chu a hneh a, last 32 a thleng a. German star Kerber hi a hmaa Larsson nen vawi thum an lo inkhelh tawhah set a la hloh miah lo a, tun tumah chuan Kerber hian set khat a hloh ve a, Kerber hi 6-2, 5-7, 6-4 in a chak a, Dominika Cibulkova nen an inkhel leh ang.

Slovak star Dominika Cibulkova hi Taiwan mi Hsieh Su-wei nen an inkhel a. Flushing Meadows khaw lum lutuk avangin an inkhel hi minute 10 chawlh an pe a. Mahse, Cibulkova hi minute 10 aia rei a chawl a, a let leh har avangin a point an paih then a. Heti chung hian 7-6 (7-3), 4-6, 6-4 in a chak ta tho a ni.

Kum hlui lama Sloane Stephens hneh lotu, Madison Keys chuan American mi tho Bernarda Pera chu 6-4, 6-1 in a hneh a, third round-ah Victoria Azarenka nen an inhmachhawn dawn a ni.

5th seed Petra Kvitova chuan Wang Yafan, China chu 7-5, 6-3 in a hneh a. Kum 28-a upa Kvitova hian kum 20-a upa Belarusian Aryna Sabalenka chu a khing leh dawn a. August thla tir lama New Haven champion Sabalenka hian 2010 US Open runner-up Vera Zvonareva chu 6-3, 7-6 (9-7) in a hneh a ni.

Aliaksandra Sasnovich chuan Russian star, 11th seed Daria Kasatkina chu 6-2, 7-6 (7-3) in a hneh a. Sasnovich hian 6-2, 6-0 a Julia Glushko hnehtu Naomi Osaka, Japan chu a hmachhawn leh dawn a ni.