Karolina Pliskova chuan Serena Williams hnehin a career-a a vawi khatnan Grand slam final a lut. Kum 24 mi Pliskova hian tun hmain Grand slam-ah a thlen san berin third round bak ala thleng ngai lo. Karolina Pliskova hian seeded no. 1 Serena Williams chu 6-2 7-6(7-5) in semifinal-ah a hneh a. Final-ah hian seeded no. 2 Angelique Kerber a hmachhawn ang.

Serena chuan, "Karolina kha a khel tha takzet a. Kha ai khan khel chhe deuh ta se chuan ka tan hun remchang a awm ka ring. Ka theihna zawng zawngin ka khel chhuak lo niin ka inngai a, chutih rual chuan Karolina kha a khel tha hle bawk a chak kha a phu zawk a ni" tiin a sawi a ni.

Pliskova hian a match hnuhnung 10-ah a zawnin a hnehna a chang tawh a ni. "Ka awi thei lo a ni" tiin Pliskova hian a lawmzia a sawi a. Sawi chhunzawmin, "Ka theihna zawng zawng a ka khelh chuan tu pawh ka hneh thei tih ka hria. Vawi tamtak champion tawh Serena ka hneh hi ka lawm hle a chu mai bakah, Final ka khel tur hi ka phur tawh hle a ni. Serena khan set khat a hloh tawh hnu pawh khan beidawng mai lovin min bei let char char a. Kha vang khan harsa takin ka chak hram a ni" a ti.

Final-ah Kerber a hmachhawn dawn a. Angelique Kerber hian final lut tur hian 6-4 6-3 in semifinal-ah Caroline Wozniacki a hneh a ni. "A ropuiin a awiawmloh hial zawk, he hmuna final ka lut leh World no. 1 ka ni ta mai hi a ropui hle a ni" tiin Kerber hian a lawmthu a sawi a ni.

(adsbygoogle = window.adsbygoogle || []).push({});