13 Sep 2015 05:08

Inkhel

Mizo Sports Website hmasa ber

​US Open 2015 hmeichhe champion Flavia Pennetta

Tukin khan Flushing Meadows-ah US Open hmeichhe final khelh zawh a ni a, Flavia Pennetta chuan 7-6 (7-4) 6-2 a Roberta Vinci hnehin a champion ta a ni.

Kum 33 mi Pennetta hian a vawi khat nan Grand Slam title a la ve ta a, hemi rual hian Tennis a chawlhsan tur thu a puang chhunzawm nghal a ni. Pennetta hi Italian hmeichhia zinga major title la thei pahnihna a ni a, US Open champion hmasa ber a ni bawk.

26th seed Pennetta chuan,"Thutlukna ka siam fel tawh a ni. Hetianga tennis chawlhsan hi ka duhthusam a ni e. Thla hmasa daih tawh khan he event zawha tennis chawlhsan ka lo tum lawk tawh a ni, hei hi a hnuhnung ber tur a ni a, hetiang dinhmun atanga chawlh tluk a awm thei lovang," tiin a sawi.

Serena Williams-i calendar Slam daltu world number 43 Vinci chuan,"Ka hlim hle a ni, Flavia pawh ka lawmpui tak zet. Kan inhriatna a rei tawh a, khelh a hautak khawp mai. Ka theih tawp ka chhuah a, mahse Flavia kha beisei phak bakin a rawn khel tha a, ka lawmpui tak zet a ni," tiin a sawi.

Flavia hian US Open zawhah match hnih khat chu khelh a la tum tho tih a sawi chhuak a, US Open erawh a khelh hnuhnung ber a ni tawh dawn.

"Kumin chhung hian ka la khel zel dawn, New York-ah erawh hei hi a hnuhnung ber a ni ang." tiin Flavia chuan a sawi a. World Number 8 hian tournament pahnih, China-ah leh WTA Finals Singapore-ah (A qualify chuan) a la khel leh ang.

"A chang hi chuan kar tin deuh thaw inkhelh hi chu a hahthlak a, ka zo tawh lo niin ka hria. Chutih laiin chawlh deuh vang vanga, tournament lian khelh hi chu chet that pawh a awl alawm, mahse a chi si lohva, chuvang chu a nia chawlh ka tum tak ni," tiin Flavia hian a chawlh puan chhan a sawifiah.

Vinci khan American Serena Williams kha semi final-ah a vaw thla kha a ni a, Italian pahnih ranking-ah pawh a hniam lamin final an khel tur chu mipui pawhin an enthat peih a rinawm loh hial. Chutih laiin Flushing Meadows khat thapin mipuiin final chu an en ta si a ni.

picture credit : Reuters

source : bbc