06 Dec 2018 04:42

inkhel

United team ropuite nen khaikhin chi kan ni lo: Mourinho

Jose Mourinho chuan Manchester United leh Arsenal te inhnehtawk hnuah a team enkawl mekte chu United team ropui tak takte nen khaikhin chi an nih loh thu a sawi.

Nilai zanah mual neitu United chuan tum hnih chu si an phur a, mahse Old Trafford-ah hian Anthony Martial leh Jesse Lingard te chuan goal khat ve ve thunin an si phurh chu an sut leh a, a tawpah 2-2 in an inhnehtawk a ni.

Mourinho pawlte chu kar hmasa lamah Premier League mawng lama awm mek Southampton nen 2-2 in an inhnehtawk a, chumi tuma an inkhel leh Arsenal hmaa an chet dan chu a inthlau ve tawh viau a, hma chu an sawn ve ngei a ni tih a lang a, mahse Premier League bikah chuan match 4 chhung chak hmel an hmu tawh lo a ni.

United hi game 15 khelh tawhah pariatnaah an awm mek a, hmahruaitu Manchester City aiin point 18 ngawtin an hniam tawh zawk a. Beisei anga an chet fuh theih loh em avangin manager Jose Mourinho dinhmun chu a derthawng chho hle a, Portuguese coach hian sawisel a hlawh tawh hle.

“Mi tam tak chuan tuna United squad hi a hmaa United team ropui tak takte nen an khaikhin thin a, Roy Keane, Ruud van Nistelrooy, Nemanja Vidic tih velte leh tuna ka naute hi khaikhin chi an ni lo,” tiin Mourinho chuan a sawi.

“A nihna takah chuan ka player te inpekna avang te hian ka lawm a, mahse kan pangngai reng thei lo tih erawh a chiang a. Arsenal kan hmachhawn pawh khan theihtawp an chhuah a, an thahnem ngaihna kha kan tangkaipui ta hle a ni,” a ti bawk.

A sawi zelnaah, “An phak ang tawkin tan an la a, a hah pawh an hah hle a. Tihsual zeuh kan neih hlek chuan Arsenal kha an hlauhawm thei hle mai a, mahse thinlung zawng zawng nen an bei let a, kha vang khan point kan hmuh theih phah a ni,” a ti.