Manchester United-in an rim mek kum 23 mi Hoffenheim midfielder Roberto Firmino chuan England a pan dawn chiang tih a agent chuan a sawi chiang ta.
A man zat tur erawh sawi chian theih a la ni lova, Hoffenheim chuan an player tha hi tlawm taka chhuah tir an tum bik lo, £20million vel tal lo chuan chhuah tir an tum loh laiin Manchester United chuan he Brazilian midfielder hi £15million vela lei an tum niin Mirror chuan a tarlang.
Firmino-a agent Roger Wittmann chuan Bild hnenah,"Ka sawi theih chhun chu England a pan dawn tih hi a ni." tiin a sawi.
Brazilian International hian season 5 chhung Bundesliga club tan hian game 153 khelin goal 49 lai a khung hman a, Liverpool leh Manchester City te pawhin an ngaihven Firmino hian Hoffenheim-ah kum hnih daih contract la nei mahse a agent chuan Germany a chhuahsan dawn tih a sawi chiang ta a ni.
Tunah hian Brazil squad-ah awmin Firmino hian Copa America a khel mek a, Chile-a an match hmasa bera Peru 2-1 a an hneh tumin bench atangin a lut nghe nghe a ni.