United player pawimawh ka nih theih ka ring: Scott McTominay

22nd July 2019, 10:07PM

Scott McTominay chuan season lo awm turah Manchester United player pawimawh tak a nih chhoh theih a rin thu sawiin, Ole Gunnar Solskjaer hnuaiah dinhmun pawimawh tak a luah theih a rin thu a sawi.

Manchester United chuan Sporting Lisbon midfielder, season liam taa goal 31 ngawt thun thei, Bruno Fernandes chu lak tumin an hel mek niin an sawi a. Hetiang boruak karah hian Scottish midfielder Scott McTominay chuan dinhmun pawimawh a chelh theih a rin thu hi a sawi a ni.

McTominay chuan, “Player thar chi hrang hrang pawh Old Trafford-ah hian rawn luh belh nual mahse Manchester United player ni tur chuan mahni kan indah san hi a pawimawh ber,” a ti.

“Kum hnih kalta atang khan dinhmun sang zawka awm theih tumin tan ka la ngar ngar a, Manchester United player pawimawh nih ngei hi ka tum hle a. Nasa zawka hma ka sawn theihna turin theihtawp chhuahin ka inpuahchah ve thin a. Player dangte laka kawng khat tala ka danglam theih dan hi ka ngaihtuah nasa a ni,” a ti bawk.

United academy atanga inzir chhuak McTominay hian season liam taah khan Premier League game 16 a khel a, goal hnih chu a thun a. UEFA Champions League-ah vawi thum a khel a, FA Cup-ah pawh vawi thum a khel bawk a. A pumpuiah game 22 a khel a, goal hnih thunin, mi goal thun tur vawi hnih a siamsak a ni.

Kum 22-a upa midfielder hian first eleven-a hmun chan theih a duhna chu a takah a thleng thei dawn hnai nia a ngaih thu a sawi.

“Game pawimawh tak khelh tur a awm changin, Barcelona leh Paris Saint-Germain tih vel hmachhawn a tul changa khel thei tura lo inpeih hi a pawimawh hle a. Bul tantu zinga tel thei turin ka inpeih a, chu chu kum hnih kalta vel atanga ka tum ber thin a ni,” a ti.

Sporting chuan Fernandes manah £70 million an chhiar a, Manchester United chuan hetiang zat pek hi an tum lo hle a. Paris Saint-Germain pawhin Portugal midfielder hi an thlithlai ve mek bawk a ni.

Bruno Fernandes bakah hian Manchester United chuan Newcastle United midfielder Sean Longstaff chu an enthla mek bawk a. Transfer window inhawn hnuah defender Aaron Wan-Bissaka chu Crystal Palace atangin an la a, Swansea atangin winger Daniel James an la tawh bawk a ni.

Copyright © inkhel.com 2024. All rights reserved.