Manchester United chuan tun season-ah bul an tan tha lo hle a, an point sang chak lo viau mahse an player te hlawh erawh a sang ta hle mai a, hlawh sanna hi 10% vel zet a ni tawh a ni.

United chuan Nilaithawhtan khan an sum dinhmun thar ber an puangzar a, thla thum chhunga hlawh atana a senso zawng zawng chu £77 million zet a ni a, nikum lama an senso aiin £7.1 million velin a pung tawh a, hei hi 10.2% vel lai a tling a. Heti a nih chuan Mourinho pawlte hlawh chu kum khat chhungin £308 million vel zet a tling dawn tihna a ni ang.

Jose Mourinho naute chu Premier League-ah 8-naah an awm mek a, hmahruaitu ni mek, an hmelma club Manchester City chu point 12 in an pha tawh lo bawk a. Heti taka an hlawh a pun nasat tak chhan chu first team squad tih chak tuma hma an lak nasat vang niin an sawi.

Mourinho chuan club thuneitute chu player tana sum hmang tlem niin a sawi fo mai a, mahse a lan danah chuan player te tana an sum hman hi a sang viau lawi si a ni. Manchester City in player hlawh vel atana 2017-18 chhunga an hman chu £260 million a nih laiin United hman zat chu £308 million ngawt a tling a ni.

Tun hnaiah United in sumdawnna, fakna leh sponsorship vel atanga an sum lakluh chu a kiam nasa ve hle a, heti chung hian kum khat chhungin £615 million atanga £630 million vel bawr chu lak luh an inbeisei tho a, an club sum lak luh tam ber a ni zui dawn a ni.

Manchester United player zinga hlawh hnem zual panga han tarlang ila, an hlawh hi kar khat chhung zela an lak zat a ni.

1. Alexis Sanchez - £450,000

2. Paul Pogba - £260,000

3. Romelu Lukaku - £220,000

4. David de Gea - £200,000

5. Juan Mata - £145,000