13 Jan 2018 07:35

Inkhel

Mizo Sports Website hmasa ber

​United mamawh Sanchez - Phil Neville

Alexis Sanchez lei tum Manchester City chu an inhnukdawk chho mek niin BBC chuan a tarlang a, Arsenal hian £35m lai an chhiar, Sanchez-a agent chuan £5m a hauh ve bawk nen, an lei dawn a nih chuan £40m vela lei a ngai dawn.

Nikum nipui bazarah khan Manchester City chuan £60m in an dawr a, mahse a thlakna tur an lak hman tak loh avangin Arsenal chuan Sanchez an chelh ta a nih kha. Tun season zawh rual hian Sanchez-a contract a zo mai tawh dawn, free agent-in a chhuah a ngai dawn.

Sanchez hian Arsenal tan rilru a pe tawk tawh lo tih a hriat, kum dang a phak lo hle. Rilru bet lo deuh chelh reng ai chuan Wenger pawhin chhuahtir mai a duh. Chutih laiin Manchester City chuan £40m vel em em man niin an hre tawh lo, kum 29 a ni tawh a, a contract a tawp tep tawh bawk si, £20m velin City hian an dawr (bid) leh, mahse hei aia sanga lei erawh an tum ta lo niin BBC chuan a tarlang.

Gabriel Jesus chuan a khup a tihhliam avangin thla hnih emaw chhung a chawlh a ngai dawn nia a lan avangin Manchester City chuan tun January transfer inhawn chhung hian Sanchez an ngaihven leh chuk chuk a, kumin nipui bazar an nghak hman lo, hetih lai hian an duh aia toa Arsenal-in Sanchez-a man an chhiar avangin an inhnukdawk tan mek.

Zirtawpni press conference-ah Manchester City manager Pep Guardiola chuan Jesus chu beisei aia a rawn kir leh hma tur thu a sawi a, kar hnih emaw kar thum hnuah an beisei tlat mai. Hetih lai hian Sanchez chungchang erawh Guardiola-a'n a sawi lang duh lo, "In zawhna te ka chhang duh lo, in zawhna awmzia ka hrethiam e, in hna in thawk a, ka chhanna che u chu in hrethiam e. Kei chuan Liverpool kan hmachhawn tur chiah ka ngaihtuah a ni," tiin Guardiola chuan chanchinbumite a chhang.

Nikum September thla khan Manchester United chuan Sanchez an bia a, tun January transfer window-ah pawh hian United hian Sanchez an bid leh tih BBC chuan a tarlang. United hian £25m in Sanchez hi an bid nia sawi a ni a, hei aia sang pawhin an la be leh thei reng niin media te chuan an tarlang.

Arsenal boss Arsene Wenger chuan, "A nihphung turah chuan tun season zawh thleng hian kan hnena awm tur a ni a, chutih laiin enge thleng dawn i lo thlir phawt ang. Tun dinhmunah engmah thleng a la awm lo," tiin press conference-ah a sawi.

Manchester United defender hlui Phil Neville chuan, "United-in Sanchez an la a nih chuan thil tha lutuk a ni dawn tlat mai. United-in player an lak fuh deuh deuh thlir kir ila, Eric Cantona leh Van Persie te an lakluh khan khawvel a barakhaih a nih kha, anni khan nasa takin United an pui, title an chawipui hial, chutiang chu Sanchez hi a nih theih ka ring a ni.

"Old Trafford-a khel tura player tha tak a ni chiang a ni. Tin, City pan lova Old Trafford a pan chuan United fans tan ani ang player tha lei chu duhthusam a ni ringawt bawk. Arsenal-ah a cham ka ring tawh lo, United hian an lei a nih chuan £25m chuan a tha thlawt a ni," tiin a sawi.

Chelsea goalkeeper hlui Mark Schwarzer pawhin Arsenal tihsual a sawichhuak a, "Season tan hma khan Arsenal khan an hralh lo kha an tisual a ni. Manchester City-in lei an tumna kha a tha thlawt, mahse an hnawl ta kha a ni a.

"An kal tir mai lo kha a pawina chu a rilruah Arsenal kha a lang tawh lo, a hmaa player ang kha a ni tawh lo. A rang thei ang bera chhuahtir chu Arsenal tihmakmawh a ni," tiin.