​United leh Chelsea dinhmun a la hriat tak tak loh

16th August 2019, 04:08AM

Mizo-te nghahhlelh em em Premier League season thar tan a ni leh ta a, team 20-te’n game khat theuh khel tawhin, an game hmasa ber Manchester United leh Chelsea an inhmachhawn nghal.

Manchester United hian Chelsea hi Old Trafford-ah lo mikhualin si li fai laiin an lo hneha, Premier League tih a nih hnuah United hian 4-0 a Chelsea an hneh vawi khatna ni nghe nghe.

Score-line ah insawp viau angin lang mahse inkhel a hmuhnawm em em a, Chelsea hi goal thun tih lovah chuan statistics lamah an sang zawk veka, inkhel pawh an thunun zawk a tih theih awm e.

Chelsea hian first half chhungin woodwork vawi hnih ngawt an pet pera, an vanduai a tih loh theih lova, Chelsea defender Kurt Zouma chuan ho takin penalty a chawi bawka, Chelsea-in an goal hmasa ber an chhuah phah.

United hi an game hmasa berah si li faiin an chak nghala, an supporter te lam pawh an phur zualin beisei an nei sang nghal hle a, a awm reng bawk a ni. Mahse, inkhel hmasa ber chauh a la ni a, United hi season tluanin eng nge an an dawn a la hriat lova, a that leh that loh a la sawi theih lo hle.

Chelsea pawh an game hmasa berah si li faiin tlawm nghal mahse tun season-ah an chhe dawn a tih theih hauh lova, United nena an inkhel tuma an inkhel en chuan team chhia an nih loh zia kan hre theuh anga, UEFA Super Cup en pawhin Chelsea hi an theuneu dawn lo tawp tih kan hre theuhin a rinawm bawk.

Manchester United-in Chelsea an khelh tum hian United player thar pahnih Harry Maguire leh Aaron Wan-Bissaka-te an che tha em em a, anni pahnih bakah an player thar dang Daniel James chuan goal a khung bawk. Heng player-te hi che tha viau mahse game khat atanga teh theih a ni lova, an tha zui zel ang tih a sawi theih loh rual rualin, an game hmasa ber hi an pha tawh lovang tih pawh a sawi theih loh.

Chelsea hian manager thar an nei a, Frank Lampard a ni. Lampard hian kar ruk vel awrh chiah Chelsea hi a la enkawl a, bazar thei lo turin Chelsea hi hrem an nih bawk bakah player pawimawh tak tak inhliam an nei. United an khelh tum hian Chelsea hian an midfielder tangkai N’Golo Kante chu a la fit that tawk loh avangin a tir atang an chhawr ngam lova, Super Cup-ah erawh Kante hi khel tluanin Chelsea midfield a hnawhkhat hneh hle.

Chelsea hi khel tha in an vanduai pawh a tih theiha, season a la intan chauha, an vanneih hun pawh a awm thei a, a nih loh pawhin a an khel chhe telh telh ve thei reng. United pawh an game hmasa berah khel tha thawkhat viau mahse an khel tha chhunzawm reng lo theia, a nih loh pawh Chelsea an hmachhawn aia tha hian season tluanin a khel thei bawk.

Mi tam tak chuan game khatin season tluan a hril emaw tih turin he inkhel atang hian team hnihte an ‘judge’ titih nghala, mahse team hnihte hi an tha nge chhia tih a la hriat lova, an dinhmun tak tak hi sawi theih a la ni lo hle a ni.

Copyright © inkhel.com 2024. All rights reserved.