Manchester United chuan Dutch striker Joshua Zirkzee lak tumin hma an la mek.

Man United leh Bologna te chu Zirkzee chungchangah an la inbe lo a, hetih lai hian Zirkzee-a agent erawh United hian an dawr tawh niin The Athletic chuan a tarlang.

United hian an hmatawng tihchak tumin player an melh kual mek a, Bologna striker kum 23 mi Zirkzee hi ngawrh taka an umzui a ni mek.

Zirkzee hian Bologna-ah release clause £34m a nei a, a hlawh tur chungchang te leh agent commission chungchang te an ngaihtuah a, club leh club erawh an la indawr lo thung.

Frenkie de Jong leh  Teun Koopmeiners an inhliam avangin Ronald Koeman chuan Zirkzee hi Euro 2024 squad-ah a ko a, 2-1 a Poland an hneh tum khan bench-ah thuin a inkhel ve lo a ni.

Thiago Motta-a hnuaiah Zirkzee a chetha hle, season liamta Serie A-ah khan goal 11 khungin assist vawi 5 a nei a, Champions League a vawi khat nan an qualify bawk.

Anre Onana leh Lisandro Martinez te ball vawrh chhuah lo dawng turin Ten Hag chuan Zirkzee hi a duh hle niin a lang.

Hojlund pawh tangkai takin a chhawr a, Ten Hag chuan Hojlund leh Zirkzee te hi inkawp turin a duh niin a lang a, an la thei a nih chuan hmatawng hlauhawm tak an nei ve thei tawh dawn niin a lang.