Manchester United chuan tun season-a an Premier League game hnihnaah, season liamtaa an hneh theih loh Wolves hmachhawnin, team hnihte hi 1-1 in an inhnehtawk.
United hian season liamta khan Wolves hi Premier League-a vawi hnih an hmachhawnah an hneh lo ve ve a, tun season-ah tlawm em lo mahse an chak zo chuang lova, point khat ve ve team hnihte hian an hlawhchhuak.
United hian an khung hmasa a, Anthony Martial chuan Red Devils tana khungin, Wolves tan Portuguese midfielder Ruben Neves chuan a khung ve bawk.
United hi chak se chuan league hmahruaitu an ni dawn a, mahse point khat chiah an hlawhchhuah tak avangin palinaah an awm a, Wolves hi 13-naah an awm ve thung.
Wolves 1-1 Manchester United
(Neves 55’) (Martial 27’)
Player Ratings
Wolves: Rui Patricio 7, Bennett 6, Coady 7, Boly 7, Doherty 6, Dendoncker 6, Moutinho 6, Neves 7, Jonny 5, Jota 6, Jimenez 6. Subs: Traore 7, Neto 6, Cutrone 6.
Man United: De Gea 6, Wan-Bissaka 7, Lindelof 6, Maguire 6, Shaw 6, McTominay 6, Pogba 5, James 5, Lingard 5, Rashford 7, Martial 7. Subs: Mata5, Pereira 6, Greenwood 6.
Match Report
Wolves hian 3-5-2 formation an hmanga, Portuguese goalkeeper Rui Patricio chuan goal vengin defence-ah Bennett, Coady leh Boly te an awma, midfield-ah Dendoncker, Neves leh Moutinho-te dah an ni. A sirah Doherty leh Castro-te awmin hmatawngah Jimenez leh Jota-te an inkawp leh bawk.
United hian 4-2-3-1 formation an hmanga, David De Gea chuan si ban nghakin, defence-ah Aaron Wan-Bissaka, Victor Lindelof, Harry Maguire leh Luke Shaw-te an intlar. Midfield-ah Paul Pogba leh Scott McTominay-te inkawpin, wing-ah Marcus Rashford bakah United player thar Daniel James-te dah niin, hmatawngah Martial a maltlata, Martial-a hnung chiahah hian Jesse Lingard dah a ni bawk.
Inkhel tan a ni a, United hian bul tan tha thawkhatin ball an chang tama inkhel pawh an thunun viau. 20mins khelh a nih hma deuhin United-in chance an nei a, mahse United hian hlauhawmah an chhuah lo.
Darkar chanve khelh a nih hma deuhin United hian goal an khunga, Lingard chaun Rashford chu ball a pe a, Rashford hian nalh takin Martial pe ve lehin Martial hian near post lamah pet goal-in United hma a hruaipui. First half-ah hian United in goal hnih an khung teuh hle a, half time hma deuh lawkin Martial chuan clear-chance a neih chu awmze nei lovah a siam.
Second half tan a in a, United lam hi an khel chhe telh telh a ni ber. United hian ball chang tam zawk daih mahse an mahni half-ah an in pass nasa a, final third an thlenin an passing a buai zel a tih theih. Darkar khat khelh a nih hma deuhin Wolves lamin an si phurh an sut a, Neves chuan Jimenez-a hnen atangin ball a hmuh chu mawi em emin United goal-ah a chhuih luta, hmahruaitu an awm ta lo.
United hian darkar khat chuang khelh a nihin penalty an hlawhchhuaka, penalty hi Pogba chuan petin a pet goal lova, United hian hmahruai theihna hun tha tak an neih chu an bawhpelh. Inkhel a hmuhnawm loh chho a tih theiha, goal luh belh pawh awm tawh lovin 1-1 in inkhel tihtawp a ni a, team hnihten point an insem ta a ni.
