Manchester United chuan Chelsea forward hlui, tuna RB Leipzig-a khel mek Timo Werner chu lakluh an duh niin Sky Germany chuan a tarlang.

German forward hian Leipzig-ah hian inkhelhna hmun a chang mumal lo hle a, a dinhmunah lungawi lo mah se nakkum nipui thleng tal Leipzig-a la awm a duh nia tarlan a ni bawk.

January thla ni 1 atangin thlasik bazar a inhawng dawn a, hetah hian Werner hi an dawr dawn em tih United chuan an ngaihtuah mek niin chanchinbu mite chuan an ziak a, January thlaah an dawr lo a nih pawhin, nakkum nipui bazar inhawn huna an dawr a rinawm hle.

United hian Leipzig hi Werner-a chungchang an sawi thawi pui tawh niin Sky Germany chuan a tarlang a, mahse offer erawh an la thehlut lova, indawrna pawh a la awm lo niin a tarlang bawk a ni.

Werner hi Real Madrid nen pawh sawi zawm a ni a, mahse Real Madrid erawh an inhnukdawk titih tawh nia sawi a ni a, Premier League club Fulham pawhin dawr an tum anga sawi a awm bawk.

Kum 27 mi hian kum 2020 July thla khan Leipzig atangin Chelsea a zawm a, Chelsea hian a manah pound maktaduai 45 seng mah se, Chelsea tan Premier League game 56 a khelhah goal 10 bak a khung lova, nikum khan Chelsea hian Leipzig hnenah bawk an hralh leh.

Nikum August thla khan Leipzig hian pound maktaduai 25.3 in Werner hi an lei let a, season hmasa khan German club tan hian Werner hian goal 16 khungin, tun season-ah erawh Leipzig tan game 13 a khelh tawhah goal 2 bak a la khung lova, first XI a chang tam lo hle bawk a ni.