Manchester United chuan Borussia Dortmund winger Jadon Sancho chu lei an tum hle a, kum 21 mi manah hian United chuan pound maktaduai 67 thehchhuak mahse hei hi Dortmund chuan an hnawlsak tih BBC chuan a tarlang.

Vawiin lam khan United chuan mimal thilah English rawlthar Sancho hi inremna an neihpui tawh thu chanchinbu mite chuan an tarlang, United hian Dortmund chu dawr nghal mahse, an hlawhchham rih phawt.

Dortmund hian an winger Sancho manah hian pound maktaduai 77.5 bawr vel an duh nia sawi a ni a, hemi bakah hian bonus pound maktaduai 4.25 vel an duh tel bawk niin BBC chuan a tarlang.

United hian Sancho-a man hi kum nga chhunga pek tlak an duha, mahse Dortmund hian kum li chhungin Sancho-a man hi dawn kim an duh thunga, hei hi an inrem theih lohna pakhat a nih thu BBC chuan a tarlang bawk.

United hian tunah hian Sancho-a chungchanga Dortmund dawr zel dan tur an ngaihtuah mek tih tarlan a ni a, sum tam zawk nen Dortmund-a an len luh leh ngei a rinawm a ni.