Manchester United chuan 2021-22 season chhung khan pound maktaduai 115.5 lai an hloh tih an puang.

United hian season khat chhunga an revenue chu 18% laiin pung mah se, pound maktaduai 100 chuang an la hloh tho a, kum 2021-a an sum hloh zat aiin pound maktaduai 23.3 in a tam zawk a ni.

Nikum khan United hian Cristiano Ronaldo, Jadon Sancho leh Raphael Varane te an lalut a, hemi avang hian an hlawh pek chhuah zat chu pound maktaduai 61.6 laiin a pung a, a squad pumpui hlawh pek nana an hman hi pound maktaduai 384.2 zet a ni.

United hlawh pek chhuah zat hi Premier League history-a tam ber a ni a, a hmaa Manchester City-in record an lo siam tawh pound maktaduai 355 chu United hian an khum.

United hian Ole Gunnar Solskjaer an banna leh, Ralf Rangnick leh a coaching staff te an rawih nana an sum hman zat chu pound maktaduai 24.7 lai a ni bawk a ni.