11 Sep 2019 05:11

inkhel

United-in Pogba man an tihniam dawn lo

Manchester United chuan Paul Pogba man an chhiar chu tihhniam an tum loh thu an sawi chhuak.

France midfielder Paul Pogba chu nipui transfer window inhawn chhung khan hmun danga kal tur angin an sawi nasa hle a. Real Madrid manager Zinedine Zidane chuan Pogba hi lak a duh hle a, Spain ram lama lak a tumna chu a puitlin thei ta rih lo a ni.

Real Madrid chuan transfer window inhawn lai khan Pogba chu lak ngei tumin hma pawh an la chho a. Amaherawhchu, club pahnihte hian inremna an neih theih rih loh avangin Pogba chu Old Trafford-ah a la awm chhunzawm zel a ni.

Los Blancos hian Pogba hi lak ngei an la duh zel a nih chuan kum thar January thla an nghah thlen a ngai tawh dawn a. January thlaa transfer window inhawn leh hunah tha tharin beihpui an thlak a ngai ang.

United chuan Paul Pogba man hi £179 million an chhiar a, eng club pawhin an midfielder hi lei chhuah tum se, hei aia tlawm hi chuan tawlh an tum loh thu an sawi chhuak a. An chhiar ang zata lei ngam lo tur chuan dawr buai lo tura an duh thu an sawi bawk.

Spain rama chanchinbu pakhat Sport chuan Real Madrid in La Liga season tharah bul an tan that vak loh avangin Zinedine Zidane-a dinhmun pawh chuti tak chuan a tha lem lo niin an tarlang a. Heti chung hian kum thar January thlaah chuan Paul Pogba chu lak luh ngei tumin beihpui thlak leh an tum niin an tarlang.

Real Madrid president Florentino Perez chuan tun dinhmunah Zidane-a squad chu an tha tawk hle nia a hriat thu sawiin, player dang lak belh tul a tih rih loh thu a sawi chhuak niin Marca chuan an tarlang a. Player man to tak lei belh tawh lo pawhin an player te man belh khawm chu a tam tawk viau tawh niin a sawi.