Manchester United chuan January thla hian Paul Pogba chu Old Trafford chhuahsan an phal dawn loh thu an sawi.

Tun hnaiah Juventus leh Paul Pogba te chu an sawi zawm nasa hle a. France midfielder hian Jose Mourinho hnuaiah dinhmun pawimawh a luah thei meuh lo a, hei vang hian chhuah mai a duh tawh niin an sawi a. Mahse, United chuan Pogba chu January thlaah an club atanga chhuah an phal dawn loh thu an sawi chhuak.

August 2016 khan Manchester United chuan a hun laia world record siamin Paul Pogba chu £89 million zetin an lei a, mahse Jose Mourinho chuan tun hnaiah a khelhtir tam lo hle a. Premier League game an khelh hnuhnun pahnih, Arsenal leh Fulham an hmachhawn tumin substitute bench-ah a thuttir ve ve a ni.

Inrinnia 4-1 a Fulham an hneh hnuah Mourinho chuan Pogba chu Nilainia Valencia nen Champions League-a an inhmachhawn hunah bul a tan tur thu sawiin, “Mi zawng zawng hmaah a that zia a lantir dawn,” tiin a sawi a. Portuguese coach hian hetiang hi sawi chhuak mahse Pogba dinhmun chu a chiang tawh lo hle a ni.

Mourinho chuan Pogba hi vice captain a nihna a hlihsak tawh a, hetiang mawhphurhna chelh tur hian a inhmeh lo tih sawiin mawhphurhna chu a hlip a. Hei bakah hian an club training naah anni pahnih hi an lo inngur tawh bawk a, an inkar boruak hi a tha lo hle.

ESPN FC 100 an tih chhuah tharah khan Pogba chu midfielder tha an thlan chhuah zingah pangana a ni pha a, mahse Mourinho chuan World Cup winner hi tha a ti ve vak lo a nih hmel a, bul a tantir mang lo a, tun thla tir lama St. Mary’s Stadium-a Southampton nen 2-2 a an inhnehtawk khan Pogba hi a che tha lem lo hle a, hemi hnu hian bul a la tan leh miah lo a ni.

Barcelona chuan hun rei tak Pogba hi an lo mitmei ve tawh a, mahse player te hlawh atan pawisa an seng nasa tawh si a, hei vang hian Barca chuan Pogba hi an lak mai hmel loh a. Juventus chuan an player hlui hi Turin khawpui lama suan let leh an hreh lo a, Juventus sporting director Fabio Paratici chuan hemi chungchang hi vawi tam tak an sawi tawh thu a sawi.