Manchester United chuan an midfielder Paul Pogba chu contract thar ziahpui an tuma, tunah hian United chuan inbiakna an kalpui tan tawh nia sawi a ni.

Pogba hian Old Trafford-ah season khat dang bak contract a nei tawh lova, contract thar a ziak lo a nih chuan nakkum January tha atangin England ram pawna club-te nen an indawr thei tawh dawna, nakkum nipuiah a thlawnin United a chhuahsan thei dawn bawk.

Pogba hian chanchin a nei thei viaua, a agent Mino Raiola chuan Pogba-a’n United chhuahsan a duh thu a sawi chiam fo a, Pogba hian United a chhuahsan duh thu sawi dawt ngai lem lo mahse, a agent sawi hi a phat sak ngai lem lo bawk.

United hian kum 2016 khan Pogba hi Juventus atangin an leia, a manah pound maktaduai 89 lai sengin, French midfielder hi a hunlaia footballer man to ber a ni pha nghe nghe.

United hian Pogba hi kum 2016 khan kum nga daih contract ziahpuiin, kum khat danga a contract pawhsei theihna an nei tel bawka, Pogba hian tun nipui hian a kum nga contract hmang zo tur ni tawh mahse United hian nikum January thla khan kum khat danga Pogba contract pawhsei theihna an neih hi an lo hmang tangkai tawh a ni.