16 Oct 2020 10:41

bakteaJr.

Mizo tlangval

United-in Pogba contract an pawt sei

Manchester United chuan an midfielder Paul Pogba contract chu kum khat dangin an pawhsei saka, Pogba contract thar hian kum 2022 June thla thleng a daih.

Pogba hian Old Trafford-ah kum khat bak contract a nei tawh lova, United hian Pogba contract-a kum khat danga a contract pawhsei sak theihna an neih chu hmangin, French midfielder hi an thlung nghet.

United hian player an lak luh reng rengin, contract an ziahpui zat bakah kum khat danga pawhsei belh theihna thil tel an ching hlea, an player contract thar ziak duh lo, a thlawna chhuak tur an venna a ni ber.

Pogba hi United chuan a contract an pawhsei sak danah hian contract thar chungchangah inremna an nei thei lo niin a ngaih theiha, United hian nakkuma a thlawna a chhuah mai loh nan a contract kum khat danga pawhsei theihna an neih chu an hmang tangkai ta niin a lang.

Pogba hi United chhuahsan duh anga sawi a ni fo va, hmanni lawkah pawh Real Madrid tana khelh a chak thu leh, engtik niah emaw a la khelh ngei a rin thu a sawia, United-a cham rei a tum tawh lo a ang hle.

United hian Pogba contract an pawhsei takah chuan, nakkum lam hi chuan an hralh mai a rinawm ta hle a, Juventus leh Real Madrid te chu Pogba nena sawizawm ber te an ni.