03 Dec 2019 10:53

bakteaJr.

Mizo tlangval

​United-in Ole ban tumna an nei rih lo

Manchester United chuan che tha tawk lo viau mahse an manager thlak tumna an nei rih lo niin English chanchinbu thenkhat chuan an tarlanga, tun aia an che chhe zual viau te a nih loh chuan an manager kawl lai Ole Gunnar Solskjaer chu hun pek rih an tum niin a lang.

Manchester United hian Premier League-ah khelh 14 khel tawhin point 18 chiah an la hlawhchhuak a, pakuanaah an awm mek. Tun Premier League season kal mekah United hian vawi li chiah hnehna an la changa, vawi li tlawm tawhin vawi ruk lai an tumpuite an inhnehtawkpui tawh bawk.

United hian Solskjaer-a hnuaiah hma an sawn hleithei lova, chanchinbu thenkhat chuan Solskjaer-a dinhmun hi a derthawng tawh viau niin ziak mahse thenkhat chuan United hian hun la pek zel rih an tum thu an tarlang ve mek bawka, rin thiam pawh a har hle.

United hian an player hlui Solskjaer-a hnuaiah in dinthar an tum mek ni pawhin a langa, player naupang tak tak an laluta, an academy chhuak player-te an chhawr nasa hle a, tun season-ah pawh an first XI-te an naupang tlang thin viau nghe nghe.

Thenkhat chuan United hi tuna hna nei lo Argentine manager Mauricio Pochettino nen pawh nasa takin an sawizawma, Italian manager hna nei lo Massimiliano Allegri pawh United manager thar tur anga sawi nasat ni mahse Solskjaer-a enkawlna hnuaiah United hi an la kal zel rih dawn ni a lang.

United hi an that tawk loh zia chu phat rual a ni lova, Sir Alex Ferguson-a awm loh hnuah hmasawn aiin hniam lam an pan pawh a tih theih awm e. Zan khat thil thua that thut thei ni pawhin an lang lova, hun a duh ve deuh dawn avangin hotute lam pawhin manager thlak mai an la tum rih lo a tih theih awm e.