11 Jul 2019 03:28

bakteaJr.

Mizo tlangval

​United-in Milinkovic-Savic an ngam huai

Manchester United chuan transfer window danga an lo ngaihven tawh thin Lazio midfielder Sergej Milinkovic-Savic chu tha thara dawr an tum mek niin Sky Italia chuan a tarlanga, an ngam huai thawkhat hle.

United chuan kum 24 mi manah hian pound maktaduai 72 an thehchhuak niin tarlan a ni a, mahse Lazio president Claudio Lotito chuan an midfielder manah hian a tlem berah pound maktaduai 90 a phut ve thung nia tarlan a ni bawk.

Nikum October thla mai khan Milinkovic-Savic hian Lazio-ah contract thar a ziak a, hemi avang hian chhuak duh mahse Lazio lam hi a nawr lui dawn lo nia sawi a awm a, season khat dang Lazio tana khelh leh pawh a hnial lem lo niin sawi a ni.

Jose Mourinho-a’n United a enkawl lai atang tawh khan United chuan Milinkovic-Savic hi an lo ngaihven tawh a, tha thara dawrin lakluh theih ngei an inbeisei mek.

Milinkovic-Savic hian kum 2014 khan Belgian club Genk atangin Lazio hi a pana, tun thlengin Lazio tan hian game 138 khel tawhin goal 31 a khung tawh.

United chuan Fiorentina defender Nikola Milenkovic pawh an ngaihven thar hle niin Sky Italia chuan a tarlang tel a, kum 21 mi hi United chuan nikum lam pawh khan lakluh an lo tum tawh. United hian Leicester City defender Harry Maguire an lalut thei lo a nih chuan 6ft 5in-a sang Serbian defender Milenkovic-a lam hi an hawi dawn niin Italian chanchinbu te chuan an ziak a ni.