Transfer hun tawp hma ngeiin Manchester United chuan Aston Villa atangin goalkeeper Emiliano Martinez lak an tum niin BBC chuan a tarlang.

Goalkeeper chungchangah United hian buaina an nei reng mai, Royal Antwerp goalkeeper kum 23 mi Senne Lammens pawh an ngaihven mek niin BBC chuan a tarlang bawk a ni.

Lammens hian United pan a chak hle nia report a ni a, Antwerp game hnuhnung pahnih pawh a khel tawh lo nghe nghe. 

Hetih lai hian Emi Martinez erawh tawnhriat ngah a ni a, World Cup lo chawi tawh a ni bawk nen, Manchester United chuan ani hi lak dan an dap chho mek nia report a ni.

Tun season-ah United hian game 4 an khel tawh a, an goalkeeper Bayindir leh Onana te chuan tihsual an nei chhen bawk nen, 3-2 a Burnley an hneh ṭum khan Ruben Amorim chuan, "Tun dinhmunah hi chuan Manchester United goalkeeper tan chet ṭhat a har a ni," tiin a sawi hial a nih kha.

Turkish club Galatasaray chuan Lammens an ngaihven mek a, ani hi an la thei lo a nih chuan Bayindir emaw Onana emaw lak an tum dawn niin BBC chuan a tarlang a ni.

Thawhṭanni zanah hian transfer bazar khar a ni dawn a, kum 32 mi Martinez hi United chuan lak hman hram tumin hma an la mek.

Season liamta game hnuhnung berah khan Martinez chuan Villa a mangṭha tawh a, mahse tun season-ah erawh Villa tan a inlan leh lawp lawp a, transfer hi a thleng dawn nge dawn lo sawi lawk theih a ni lo a, United hian player an hralh chho ta nual a, goalkeeper tha an lak theih mai chu a rinawm ta a ni.