Manchester United chuan Juventus striker Mario Mandzukic chu lakluh tum mahse Mandzukic hian a hlawh a tih hniam ve phawt United lam hian an phut niin chanchinbu mite chuan an tarlang.
United boss Ole Gunnar Solskjaer chuan a tlarhma thawm that nan Croatian striker hi lakluh duh mahse Mandzukic-a hlawh hi tih hniam a nih phawt a ngai a, a nih loh chuan United hotute lam chuan Mandzukic hi an duh lo niin tarlan a ni.
United hian tun nipui chhung khan an tlar hma player pahnih Romelu Lukaku leh Alexis Sanchez-te chu Inter Milan lamah an chhuah tir a,anni hmunruak luah tur player thar lakluh mumal an nei lo bawk nen Solskjaer chu tlar hmaah a indaih lo hle.
United hian striker pangngai an kawl lo tawp tluk a ni a, no.9 anga an chhawr thin Marcus Rashford leh Anthony Martial-te chu no.9 ai chuan winger an ni mah zawk a tih theih awm e.
Mandzukic hi kum 33 mi a ni a, kum upa lam a ni ve tawh nen United hian a man leh a hlawhah sum sen hnem an tum lo viau niin a langa, tunah hian Juventus-ah Mandzukic hian kar khatah pound 200,000 a hlawh mek a, Juventus-a hlawh hnem ber parukna a ni nghe nghe.
Mandzukic hi Juventus manager thar Maurizio Sarri chuan tun season-ah a chhawr khat hle a, Champions League squad-ah pawh Mandzukic hi telh ni lovin, ani hian Juventus chhuahsan a hnial a rinawm tawh loh hle a ni.