14 Feb 2020 11:09

bakteaJr.

Mizo tlangval

​United-in manager thar tur an melh?

Manchester United chuan an manager Ole Gunnar Solskjaer chu an thlak thut lovang tih a sawi theih lova, an manager thar tur an melh mek niin chanchinbu mite chuan an tarlang.

United hian Solskjaer chu tun season chhunga ban an tum lo tih tarlan tel a ni a, mahse an result-in hma a sawn lo zel a nih chuan season zawh rualin Norwegian manager hi ban mai an rilruk tawh niin a lang.

United hian Solskjaer thlak tu atan tuna Paris Saint-Germain boss Thomas Tuchel chu an hmu tai viau niin France lama chanchinbu te chuan an tarlanga, United hian Solskjaer an ban a nih chuan Tuchel hi an lak luh tum ber tur niin tarlan a ni.

Tuchel hi tun hnaiah a ‘luck’ viau niin a langa, Manchester United bakah Bayern Munich pawhin an manager thar atan an duh viau nia sawi a ni bawk.

Tuchel bakah hian United chuan an manager thar atan Tottenham boss hlui Mauricio Pochettino pawh an ngaihven hle nia sawi niin, Juventus boss hlui Massimiliano Allegri pawh United hian an ngaihven viau nia tarlan a ni.

Tun season chawhma lam khan Tottenham chuan Pochettino hi an bana, Argentine manager hian tunah hian club enkawl la nei leh lovin kar hmasa lam khan Premier League lama kir leh a chak thu a lo sawi tawh.

Italian manager Allegri hi nikum nipui khan Juventus chuan an chhuah tir a, Allegri hian tunah club enkawl la nei lovin, Juventus chu kum 5 chhungin Serie A title 5 a lak pui a ni.