Manchester United chuan an tum angin Leicester City defender Harry Maguire chu an lalut thei lo a nih chuan Tottenham defender Toby ALderweireld-a lam an hawi zawk dawn niin chanchinbu mite chuan an tarlang leh ta.

United hian Foxes defender palian Maguire hi pound maktaduai 80 zetin an lalut mai dawn emaw tih a ni tawh a, mahse eng mah tih fel thu hriat tur a la awm lo zel.

Maguire hi defender tha ni mahse pound maktaduai 80 chuan a to lam hret a ni a, United man tlawm daih zawkin Belgian defender Alderweireld chu an duh chuan an lalut thei dawn niin a lang.

United hian tun nipui bazar chhungin Maguire hi pound maktaduai 70 in an dawr tawha, mahse an hlawhcham. Leicester lam hian an defender manah hian pound maktaduai 80 tal an phuta, hemi zat hian United hian Maguire an lalut a nih chuan Maguire hi khawvela defender manto ber a ni dawn.

Alderweireld hi defender tha tak a ni a, Premier League defender tha ber zinga mi pawh a tih theih awm e. A kum erawh a upa tan ve deuh tawha, tunah hian kum 30 mi a ni a, Maguire erawh kum 26 chiah a ni.

Alderweireld hi tunah hian pound maktaduai 25 chauhvin a lei chhuah theih meka, United hian sum tam tak an ‘save’ ngei dawn tih pawh a lang. United hian Maguire hi manto taka lei ai chuan kum hnih vel tal tha taka la khel thei tura ngaih Alderweireld-a lam an hawi zawk dawn niin chanchinbu thenkhat chuan an ziak nasa hle a ni.