Manchester United chuan an striker Romelu Lukaku chu a man a zirin chhuah tir an hreh lo thu Sky Sports chuan a tarlanga, United hian Lukaku manah hian pound maktaduai 75 vel an duh niin Sky Sports chuan a tarlang tel bawk.

United hian Jose Mourinho-a hnuaiah kum 2017 khan Lukaku hi Everton atangin an laluta, a manah hian pound maktaduai 75 vel tho hi sengin, an sum sen zat hmuh let dan an ngaihtuah niin a lang.

Sky Sports chuan thla hmasa lam khan Inter Milan manager Antonio Conte chuan Lukaku hi San Siro lama lakluh a duh thu a lo tarlang tawh a, mahse Inter hian United hi an la dawr lo nia tarlan a ni.

Inter Milan hi tun thla ni 30 thleng hian Financial Fair Play chungchangah UEFA chuan a khuahkhirh rih a, hemi hun a zawh hma hi chuan Lukaku hi an dawr a rinawm lova, thla tharah erawh Belgian striker hi an dawr ngei a rinawm.

Inter manager thar Conte hian kum 2017-a Chelsea a enkawl lai khan Lukaku hi lakluh a lo tum tawh a, mahse hlawhchhamin Alvaro Morata a chang ta zawk a, tunah erawh Lukaku hi chan ngei a inbeisei hle tawh tura ngaih a ni.

Inter hian an captain hlui Mauro Icardi chu chhuah tir dan an ngaihtuah niin chanchinbu mite chuan an tarlang nuala, mahse Icardi hi dawrtu mumal an la awm lo. Inter hian Icardi hi buaina neuh neuh an neihpui thin avangin kum 26 mi Lukaku hmanga thlak an tum a nih hmel.

Lukaku hian United tan game 96 khel tling tawhin goal 42 a khung tawh a, mahse a game hnuhnung pariatah goal a khung tawh lova, United lamah hian Marcus Rashford chuan a luahlan ti tih tawh a ni ber.