Manchester United chuan a hma lama Harry Kane dawr an tum niin The Guardian chuan a tarlang. Transfer window a inhawng tep tawh a, nipui bazar inhawn chhung zawnga England striker ngaihven ai chuan, a hma lama dawr thuai thuai an tum niin The Guardian chuan a tarlang a ni.

Erik ten Hag chuan January transfer window inhawn lai khan striker tha tak lak an tum thu a lo sawi tawh a nih kha. Champions League-ah an inpet kai tawh a, Premire League leh Champions League lama team tha te el phak tur chuan United hian striker tha tak an neih a ngai a ni.

Kum 29 mi England striker hian Tottenham-ah kum 2024 thleng contract a nei. Kane hian contract thar a ziak lo a nih chuan, nakkum nipui bazar inhawn hunah a thlawnin Spurs a chhuahsan thei dawn.

Spurs Chairman Daniel Levy hi dawr harsa tak a ni chiang, Manchester City pawhin Kane lak an tum lai khan a lo hnar chiang hle a nih kha. Hetih lai hian kum khat bak Spurs-ah Kane hian contract a nei tawh lo, kum 30 a ni dawn tawh a, man to taka an hralh theih lai a nih avangin, Spurs hian Kane hi chhuahtir pawh an pawiti dawn lo nia ngaih a ni.

United-in Kane an la thei a nih chuan, a man erawh a tlawm lem lo ang. Ten Hag chuan a mamawh tak lak nan chuan sum tam tak thehchhuah pawh a ui dawn lo nia report a ni bawk.

United leh striker dang Victor Osimhen leh Hojlund te pawh sawi zawm an ni mek a. Napoli striker Osimhen hi £130m emaw vel chuan an la thei maithei a, kum 20 mi Denmark striker Hojlund pawh hetiang vel man tur nia ngaih a ni.

Engpawh nise, Premier League lama tawnhriat ngah, an team an chet that loh lai pawha league goal 28 khung thei Harry Kane hi United mi duh ber niin a lang a, transfer window inhawn tak tak hmain indawrna kalpui an tum mek niin The Guardian chuan a tarlang a ni.