Brentford striker Ivan Toney chu Manchester United-in tun nipui bazar inhawn hunah lak an tum dawn niin Fabrizio Romano chuan a tarlang.

Toney hi Brentford lamin chelh duh mah se, an chelh thei dawn lo tih an inhrechiang tawh. Arsenal pawhin England international hi lak an tum dawn nia report a awm mek bawk.

Tun nipui bazar inhawn hun hi chuan Toney hian club lian dang a pan ngei dawn nia ngaih a ni hrim hrim. Nipui bazar a inhawng tep tawh, club lian tak tak an rawn inlar chho tan mek zel e.

Toney hi goal khung thei tak a ni a, a team che tha lo mah se amah a chetha em em thin. Hrem a nih avangin hun rei tak inkhel thei lo mah se, tun season Premier League-ah game 10 atangin goal 4 a khung tling leh der tawh.

Manchester United hian Rasmus Hojlund nei mah se, player naupang a ni a, tlem la nghah deuh te pawh a ngai niin a lang. Heng te a nih avang hian Toney hi kawl theih United chuan an duh hle niin Fabrizio chuan a sawi.

Tin, hmatawng lamah United hian Hojlund, Rashford leh Toney te hi inel se an duh dawn bawk niin Fabrizio chuan a sawi a, Toney hi United hian an nei thei a nih ngat chuan an hmatawngah duhthlan tur an nei tawh dawn a, Erik ten Hag-a squad pawh a chhah zual sawt dawn tihna a ni.

England International Toney hian kum 2025 thleng Brentford-ah contract a la nei, a chhuak dawn a nih chuan a man a tlawm em em dawn lo. Hetih lai hian United hi sum lamah an buai dawn lo a, Sir Jim Ratcliffe chuan transfer bazar atan sum thahnem tak a thehchhuak dawn nia report a ni.

Sawmna : Advertisement hi min click sak ve thin turin kan sawm a che u.

Tun nipui bazar inhawn hun chu Arsenal leh Manchester United mai bakah, English club lian dang te pawhin Premier League-a tawnhriat ngah tawh em em Toney hi an ngaihven dawn a ni.