​United-in Issa Diop an duh

16th June 2019, 10:06PM

Manchester United chuan West Ham defender Issa Diop an duh thu leh a manah pound maktaduai 45 lai thehchhuah an inhuam thu Sky Sports chuan a tarlang.

United hi tun nipuiah defender nen deuh hlir sawizawm an la ni a, Diop pawh centre-back niin United hian an defence thuam that an tum zia a lang.

United hian tun nipuiah player pakhat  an lalut tawh a, Welsh winger naupang Daniel James chu Welsh club Swansea City atangin an lo lalut tawh.

Sky Sports hian Diop hi West Ham lamin hralh an tum loh thu leh pound maktaduai 60 tling lova dawrna an hmuh chu hnawl hmak hmak an tum niin a tarlang bawk.

Nikum khan West Ham chuan Toulouse atangin Diop hi an lei a, a manah pound maktaduai 22 sengin, Diop hian a season hmasa berah Hammers tan game 38 khelin a che tha hle.

United hi Napoli defender Kalidou Koulibaly leh Leicester City defender Harry Maguire nen pawh sawizawm an ni a, mahse Koulibaly hi pound maktaduai 100 man vel a ni dawnin a langa, Maguire lah Manchester City nen an inchuh avangin a tlawm dawn lo bawk.

United hian Antonio Valencia thlaktu atan Crystal Palace right-back Aaron Wan-Bissaka an dawr ve mek bawka, player naupang lam deuh an melh niin a langa, an lakluh tawh James lah kum 21 mi chauh a ni.

United chuan kum 22 mi French defender Diop hi an lalut duh a nih chuan sum an seng tlem dawn lova, mahse Koulibaly leh Maguire te ai chuan a sum hrawm tlem deuh tura ngaih a ni.

Copyright © inkhel.com 2024. All rights reserved.