Manchester United chu PSV Eindhoven winger Cody Gakpo dawr turin an inbuatsaih mek tih Sky Sports chuan a tarlang.

United hian tun nipui bazar chhungin an tlarhnung thawm that nan Lisandro Martinez leh Tyrell Malacia te an lalut tawh a, midfield lamah Christian Eriksen an lalut tawh bawk a, tunah hian forward lakluh tur an dap mek.

United boss Erik ten Hag chuan kum 23 mi hi lakluh a duh hle nia sawi a ni a, Ten Hag leh Gakpo te hi agency khat hnuaia awm an ni bawk nen, Ten Hag hian Dutch footballer hi lakluh theih a inbeisei hle nia tarlan a ni.

Tun nipui bazar chhungin United hian forward player pahnih Benjamin Sesko leh Marko Arnautovic te an dawr hlawhchham tawh a, Anthony Martial a inhliam bakah, Cristiano Ronaldo hmalam hun a chiang lo bawk nen, United hian nipui bazar inkhar hmain Gakpo hi lakluh an tum ruh hle niin a lang.

United hian Ajax forward Antony pawh nasa takin an dawr a, mahse Ajax hian Brazilian forward man atan hian pound maktaduai 70 vel an duh avangin United hian midang an melh a, Gakpo hi dawr hlawhchham an tum tawh lo niin chanchinbu thenkhat chuan an tarlang a ni.