Fulham-in Mitrovic-a goal hmangin hma hruai hmasa mah se, Manchester United chuan Bruno Fernandes leh Sabitzer te goal hmangin 3-1 in Fulham an hneh a, FA Cup Semi final an lut ta a ni.
FA Cup Semi final-ah Manchester United hian Brighton an hmachhawn ang a, semi final pakhat zawkah Manchester City leh Sheffield United an inhmachhawn bawk ang.
Old Trafford-a FA Cup quarter final match-ah hian, first half hmuhnawm loh tak kan en, goal hlauhawm a awm mang lo a, United chuan first half-ah shot on target vawi hnih chiah an nei nghe nghe.
Second half tirah Fulham-in an nawr na hle, goal hlauhawm vawi hnih an nei a, veilam sir atanga Robinson-a shot chu De Gea chuan a lo dang. Hemi hnu chiah hian Willian chuan thuai goal a tum, De Gea chuan a lo dang leh.
Minute 50-ah Fulham chuan goal an khung ta nge nge, Pereira chuan corner petin, Diop chuan a lo khawih kawi a, far post atangin Mitrovic chuan a chhuih goal, si khat faiin Fulham chuan hma an hruai.
Hemi hnu lawk hian Mitrovic chuan si hnih faia hmahruai theihna hun tha tak an nei, Mitrovic-a tauh tha zet chu De Gea chuan tha zetin a lo dang hlauh.
Erik ten Hag chuan McTominay la chhuakin Antony a dah lut a, ani danglamna a rawn siam nghal. Mual dinglam sirah Antony chuan hmun thawl a hmu nual, minute 70 an khel tling chiah tihin red card pathum phawrh a ni.
Mual dinglam sirah Antony hmangin Manchester United chuan counter attack an nei, Sancho-a tan Antony chuan ball tha tak a pe a, goalkeeper a bum hnuin goal-ah a pet, Willian chuan a kutin a lo dang.
Referee Chris Kavanagh chuan VAR hmangin uluk takin a en a, hetih lai hian Fulham manager Marco Silva chuan a lo ankhum ni tur a ni, referee chuan Silva hi a hnawtchhuak.
Side monitor a bih zawh hnuin referee chuan penalty a ham a, Willian chu red card a hmuh, Mitrovic thinrim chuan referee a tawng a, hei vang hian ani pawh direct red card pek a ni chhunzawm bawk.
Penalty hi Bruno Fernandes chuan goal-ah a chantir a, United-in an siphurh an rul. Goal a luh atanga minute hnihna lekah Sabitzer chuan United tana a goal hmasa ber a khung.
Box veilam sir atanga Luke Shaw-a cross chu Sabitzer chuan minute 77-ah mawi takin a kheng goal a, 2-1 in United chuan hma an hruai.
Fulham-in player pahnih lai an chan avangin, United chuan game an thunun ta hle a, hun pangngai a zo, minute 7 pek belh a ni a. Hetah hian Bruno Fernandes chuan kawh zetin a chhuih goal leh a, 3-1 in Manchester United chuan hnehna an chang ta a ni.
Mitrovic a khel tha a, a hnawk hle. United defender ten an ti hleithei lo. Willian pawh Fulham player tangkai tak a ni bawk. Anni pahnih hnawhchhuah an nih avangin Fulham an che thei ta lo a ni ber mai.
Willian-a handball kha chu, thil thlen lai kha chuan handball niin a lang lo. Chutih laiin video replay uluk taka en a nih hnuah erawh penalty leh red card a ni tih a chiang a, Mitrovic kha inthunun thei selang chuan thil danglam a la thleng thei maithei.
Referee laka a khawsak dan avang khan Mitrovic khan hremna dang a dawn belh maithei, Serbian striker hian football a khelh chhungin red card vawi 7 a chawi tawh a, heng zinga vawi 6 chu direct red card a ni.
Second half tir lamah Fulham an khel mawi em em, Manchester United an talbuai, chutih laiin counter attack vawi khat kha thil danglamna a ni ta a ni.