Manchester United chuan Ajax captain Matthijs de Ligt chu an ngam huai hle a, Barcelona ai pawhin hlawh pek hnem an inhuam niin The Sun chuan a tarlang.

Kum 19 mi De Ligt hi tunlai defender naupang-ah chuan a ‘luck’ ber a tih theih a, club liante it rawn a ni. Barcelona a pan dawn angin sawi a ni a, mahse English club sum ngah Manchester United an rawn lang ve leh ta.

United hian Dutch defender hi kum khatah pound maktaduai 12.3 hlawh tura thlem an tum niin The Sun chuan a tarlanga, hei hi Barca in hlawh tir an tum zat aiin a tam daih a ni.

Kar khatah United chuan De Ligt hi pound 240,000 hlawh tir an tum nia tarlan a ni a, an defence tha lo siam tha tu tura an mi duh ni ngeiin an ngai.

Chanchinbu thenkhat chuan Barcelona chu United nen hlawh inpun siak lama telpui an tum lem lo niin an tarlanga, De Ligt hian sum tam zawk a um chuan United hian an lakluh mai a rinawm viau.

De Ligt hian pawisa tam zawk a hlawhna tur lam United hi a pan chuan first eleven a chang dawn chiang sa anga ngaih a ni a, mahse trophy erawh a chawi tam nghal a rinawm loh.

Barcelona lamah kalin a hlawh tlem zawk deuh mahse De Ligt hian trophy a chawi ngei dawn tih a chiang sa a, a kalna tur hi a duhthlannaah a innghat dawn ni ta berin a lang.

Ajax manager Erik ten Hag chuan De Ligt hi nipuia a chhuah tur thu a lo sawi tawh a, Bayern Munich pawhin an duh ve bawk niin Ten Hag hian a sawi a ni.