11 Aug 2019 11:19

bakteaJr.

Mizo tlangval

​United-in Chelsea an sawp

Manchester United chuan tun season-a an game hmasa berah Chelsea chu Old Trafford-ah an lo mikhuala, United hi inkhel hmuhnawm takah si li faia chakin point thum hlu tak an hlawhchhuak.

United tan hian Marcus Rashford chuan goal hnih a khunga, a goal hmasa zawk hi penalty spot atanga a khung niin, Rashford bakah hian Anthony Martial leh tun nipuia Swansea atanga an lei thar Daniel James-te chuan United tan a game hmasa berah hian goal an khung ve bawk.

Manchester United 4-0 Chelsea

(Rashford 18’pen, 67’, Martial 65’, James 81’)

Player Ratings

MAN UTD:De Gea 8, Wan-Bissaka 8, Lindelof 7, Maguire 8, Shaw 7, McTominay 7, Pogba 8, Pereira 8, Lingard 7, Martial 8, Rashford 8. Subs: James 7, Greenwood n/a, Mata n/a.
CHELSEA:Kepa 6, Azpilicueta 6, Zouma 5, Christensen 6, Emerson 7, Jorginho 6, Barkley6, Kovacic 7, Mount 6, Pedro 7, Abraham 6. Subs: Pulisic 6, Giroud 6, Kante n/a.

Match Report

United manager Ole Gunnar Solskjaer chuan tun nipuia an player lei thar pahnih Harry Maguire leh Aaron Wan-Bissaka-te chu inkhel bul a tan tir nghala, an player thar dang James chu bench lamah dahin second half-ah a luh tir a, James hian goal a khung nghe nghe.

Chelsea lamin player chhawr theih loh an ngah deuha, Antonio Rudiger, Willian, Ruben Loftus-Cheek leh Callum Hudson-Odoi te chu an khelh theih loh bakah N’Golo Kante chu inkhel bul tan turin a la fit tawk lo bawk. Chelsea hian Kante inkhel bul tan thei lo leh Rudiger khel thei lo hi an tuar a tih theiha, an defence a pan angreng hle.

Inkhel tan a ni a, a hmuhnawm nghal hle. Minute nga pawh khelh a nih hmain Chelsea striker Abraham chuan box chhung chiah dinglam atangin mawi em emin United goal lamah ball pet a, post a per chiang hle. Hemi hnu deuh lawk Chelsea hi defence line-ah an in pass suala, United lam tan chance tha tak niin Martial chuan goal-ah pet mahse Kepa-a’n harsa lem lo takin a lo save.

A tir minute sawm chhungin Chelsea an hlauhawm zawk a tih theiha, mahse clear-chance erawh a vang. Minute sawm chuang hret khelh a ni a, Mount chu United box pawn hma lawkah ball pek niin, goal-ah pet zui mahse De Gea tan thil harsa a awmlo.

15mins vel khelh a ni a, Chelsea defender Zouma chuan an box chhungah United forward Rashford a ti tlua, Chelsea hian penalty an chawi. Penalty spot atang hian penalty hlawhchhuaktu  Rashford chuan pet goal-in United hma a hruai pui.

Darkar chanve chuang khelh a ni a, Barkley chuan 25yards vela hla atangin goal-ah a shoot-a pet chhe lem lo mahse goal a zawn lo deuh. 40mins khelh a nih hma deuh chiahin Pedro chuan ball a khalha, United box chhung veilama awm Barkley a pe, Barkley hian goal-ah petin De Gea-a’n a lo save a, De Gea save per hi Jorginho chuan goal-ah lo shoot ve leh nghal mahse block sak a ni.

Chelsea an hlauhawm zui zela, box chhung veilama awm Emerson chuan ball a changa, a ke veilamin goal-ah kawh takin pet mahse post a pet leha, Chelsea-in vawi hnih post an pet perna a ni. Inkhel a hmuhnawmin a nung hle a, team hnihten mit an ti tlai hle. First half-ah goal luh belh tawh lovin 1-0 a tihtawp a ni.

Goal an khung hnuah United khel tha chho viau mahse Chelsea hi first half-ah an khel tha zawk a tih theiha, chance insiam hnem zawkin ball pawh an chang tam zawk. Chelsea-in post vawi hnih ngawt minute 45 chhungin an pet pera, an vanduai a tih theih awm e.

Second half an khel tana, first half ang bawkin a hmuhnawm leh nghala, team hnihte atangin chance kan hmu leh nghal mawlh mawlh a ni ber. Second half tan atanga minute sawm vel a liamin, Emerson chuan box pawn veilamah ball a changa, goal-ah chhuihin De Gea chuan a lo hnek chhuak.

Darkar khat chuang khelh a ni a, Chelsea lamin ball chang tam zawk mahse goal an chhuah belh; Chelsea hian United box hma chiahah ball an hloha, United chuan counter attack-in Pereira cross atangin Martial chuan goal a khunga, hemi hnu lawk hian Pogba pass tha zet hmang tangkaiin Rashford chuan United goal thumna a khung zui leh nghal.

80mins khelh chhoh a ni a, Chelsea hian freekick an hmu; freekick atang hian United box chhunga ball vawrh luh a ni a, United hian ball changin Chelsea an nawr let nghal; Pogba chuan amahin ball a khalha, Chelsea defender lamin an tihbuai velah a chhaka awm James chu tha em em in a pe a, James hian goal-ah petin Emerson a pera goal-ah a lut zui.

First half-ah Chelsea an hlauhawm zawka, United defender te an talbuai lek lek thin. Second half-ah erawh United an insiamthaa, an khel thaa, an goal hnihna luh hnu atang phei chuan Chelsea hi an che hleithei tawh lo a ni ber.

Chelsea lam hian ball chang tam zawk thin mahse an tlar hma a hriam tawk lo hle a, an tlar hnung a phui tawk lo bawk; United counter-attack an dawl lo a ni bera, United goal thun hi counter-attack atanga an thun deuh vek a ni nghe nghe a ni.