Manchester United chuan Casemiro thlakna tur an ngaihtuah mek a, Monaco midfielder Youssouf Fofana chu Brazilian midfielder thlakna atan an melh mek niin English media te chuan an tarlang.

Nikum nipui bazar inhawn lai khan Casemiro hian Real Madrid atangin Old Trafford a pan a, a season khatnaah a chetha hle. Hetih lai hian tun season erawh a che hleithei lo, a inhliam chho nawk bawk nen, kum 31 mi hi Saudi Pro League lam pan tur ang tein an sawi mek.

France international Fofana hi United player ngaihven a ni tih media te chuan an tarlang mek, kum 24 mi hian France tan game 13 a khel ve tawh a, kum 2020 January thla khan Strasbourg atangin Monaco a pan a, player langsar tak a ni chho mek.

Brazil tana game 75 lai khel tawh Casemiro hi United chuan hun rei tak chhung atan chhawr an tum lo nia ngaih a ni a, an talbuai chhunga United team tiziaawm tur chauha lak niin football pundit te chuan an sawi thin bawk.

Heng te a nih avang hian Manchester United chuan January transfer window inhawn hunah hun rei zawk atana chhawr theih tur midfielder an dap dawn nia report a ni a, Manchester Evening News chuan player thar 4 lak tumin United hi an inbuatsaih niin a tarlang bawk.

French chanchinbu RMC Sport tarlan dan chuan, kum 24 Fofana hi United chuan January transfer window inhawn hunah an dawr dawn a, a man hi €25million vel nia ngaih a ni.