Crystal Palace an hmachhawn tuma Casemiro-a red card hmuh chungchangah Manchester United appeal an tum lo.

Inrinni zan khan Manchester United chuan 2-1 in Palace an hneh a, minute 70-ah Brazilian midfielder Casemiro chuan Hughes a reh avangin referee chuan direct red card a phawrh.

Erik ten Hag chuan referee Andre Marriner-a thutlukna chu a pawmpui lo a, hetih lai hian red card kha an appeal loh tur thu Dutch coach hian a sawi chiang, Brazil international hian match 3 atan hrem a tawk dawn a ni.

"Ka tan chuan thutlukna dik tak a ni lo, mahse dan angin dikna kan nei chuang lo," tiin Ten Hag chuan a sawi.

Social media-ah mi tam takin Casemiro chet dan kha red card pekna tur niin an ngai. Football pundit thenkhat te pawhin video footage chhunzawm zelah kha chuan Casemiro khan tih nat tumin a rek lo iin an ngai bawk.

United hian Casemiro-a red card kha suttir tumin thuneitute lamah thu thlen ta se la, an hlawhtling lo a nih chuan match khat dang hrem belh a ni leh dawn bawk si, chungte a nih avang chuan Erik ten Hag chuan appeal loh mai a duh ta ni berin a lang bawk.

Casemiro hian Leeds United an hmachhawn match hniah United tan a inlan thei dawn lo a. Europa League lamah erawh Barcelona a hmachhawn thei ang. Premier League match-a Leicester City an hmachhawn hunah a hremna a hmang zo chiah ang a.

Carabao Cup Final-a Newcastle United an hmachhawn hunah United tan a lo kir leh thei dawn a ni.

Nilaini zan zanlaiah hian Leeds United an hmachawn dawn, Manchester United tan Anthony Martial, McTominay leh Antony te a inlan thei dawn lo niin Erik ten Hag chuan a sawi bawk.