England defender Jarrad Branthwaite chu Manchester United-in an hming tawh niin The Times chuan a tarlang. He defender naupang hian Old Trafford pan a duh ve a, mimal thilah United nen hian an inrem tawh nia tarlan a ni.

Hetih lai hian Everton chuan an defender hi hralh an phal chiah lo a, mahse sum lama harsatna an tawh avangin an hralh dawn a nih chuan, man to taka hralh an tum. arrad Branthwaite-a manah hian Everton chuan £70 million vel an chhiar niin Times chuan a tarlang.

Mimal thilah chuan United lam hian hma an la chak hle a, kum 21 mi hi contract chungchangah an dawr hlawhtling tawh nia report a ni a, kar khat chhungin United hian Branthwaite hi £150,000 atanga £160,000 vel hlawhtir an tum nia report a ni bawk.

6ft 4in-a sang Branthwaite hi centre-back ke pahnih hmang thiam a ni a, club lian dang pawhin an ngaihven hle. Season liamta khan Toffees tan tha a thawh hlawk hle, point 8 lai paih sak ni mah se, Premier League-a an inhamtan nan player tangkai ber pakhat a ni.

Sum lama harsatna an tawh avangin Everton chuan an player thenkhat an hralh a ngai dawn niin a lang a, hetia man to taka an player rawn dawrtu an neih chuan hralh nual an tum nia tarlan a ni.

Manchester United hian defender pahnih emaw tal lei an tum niin English media te chuan an tarlang. Raphael Varane chu contract an pe tawh lo a, season liamta khan an defender te an inhliam nual a nih kha.

Red Devisl hian kum 18 mi Lille defender Leny Yoro pawh an umzui reng niin The Athletic chuan a tarlang a, ani hi Liverpool pawhin lak tumin an zui mek bawk. Tin, United hian Bayern Munich atanga Matthijs de Ligt lak luh dan an dap dawn niin English media te chuan thu an vawrh darh mek bawk.