Manchester United chuan Marcus Rashford, Alejandro Garnacho, Jadon Sancho, Antony leh Tyrell Malacia te chu club dang zawng turin an hrilh a, pre-season training pawh zawm tlai turin an hriattir bawk niin The Athletic chuan a tarlang.
Heng player 5 te ni lo, mi dang zawng chu kar leh thawhtanni hian Carrington-ah in report tur a ni a, player 5 kan tarlan tak te erawh United chuan transfer window inhawn chhung hian club dang zawng turin an hrilh a, hemi atan hian chawlh pawh an pe rei bik bawk a ni.
Wolves atanga £62.5million ($85.3m)-a an lei Matheus Cunha chuan Rashford-a jersey number, no.10 chu season tharah a ha tawh dawn bawk. Rashford, Antony leh Malacia te hian season liamta khan loan-in club dang an lo zawm tawh a, anni pathum hi Amorim-a game plan-ah an tel tawh lo hrim hrim nia report a ni.
Season liamta khan Jadon Sancho pawh Chelsea-ah loan-in a khel a, Chelsea hian an lei duh a nih chuan £25m-in an lei thei. Mahse Sancho hian hlawh a phut sang deuh nia report a ni a, hei vang hian Chelsea nen inremna an nei thei ta lo a ni.
Europa League final an khelh zawh hlima social media lama ang bawrh bawrh Garnacho pawh Amorim chuan club dang zawm turin a hriattir tawh a, June thla laihawl khan United leh Garnacho te hian inbiakna an nei a, Garnacho pawhin club thar neih a duh a, mahse Premier League chhuahsan erawh a duh lo niin The Athletic chuan a tarlang.
United-in heng player 5 chhuah an phalsak te hi an chhuah hma chu an enkawl zel dawn bawk a, club thar zawnna hun chawlh an hman chhung hian Carrington-a damdawi lama inenkawlna te, training neihna hmun te pawh hman phalsak an la ni dawn a ni.
United hian player hralh an harsat hle, an player te hi an hlawh hnem a, club dang an pan dawn chuan an hlawh tihhniam a ngai hlawm dawn. Heng te a nih avang hian player thenkhat chuan Old Trafford-a la awm chhunzawm zel an duh hlawm thin.
Hetih lai hian nipui bazarah hian player thar lei an duh ve a, Cunha an la lut tawh a, Bryan Mbeumo erawh an la la thei lo. Player thar lei turin United hian inhralh an mamawh, hmanhmawh taka an player te hralh tumin tunah hian hma an la mek a ni.
Pre-season game hmasa ber chu July ni 20 hian an khel dawn a, Leeds United an hmachhawn ang. Hemi hnu hian Amorim leh a team te chuan United States an pan ang a, Premier League Summer Series an khel ang.