Manchester United chuan Premier League inkhelah Southampton chu Old Trafford-ah an lo mikhuala, team hnihte hi chak zawk awm lovin, 2-2 in an inhnehtawk.
United tan hian Marcus Rashford leh Anthony Martial te chuan goal an khunga, Southampton tan Stuart Armstrong leh Michael Obafemi te chuan goal an khung ve bawk.
United hian pathumnaa chhoh dawrh theihna huntha em em an neih an bawhpelh a ,khelh 35-ah point 59 nei tawhin, Leicester City nen an point inanga, goal difference-ah an hniam zawk avangin United hi panganaah tho an awm chhunzawm. Southampton hian khelh 35-ah point 45 hlawhchhuak tawhin, 12-naah an awm ve thung.
Southampton hian bul an tan tha hle a, a tir minute 20 chhung vel chu United chhaih buai hneh hle in, khel tha zawk an ni. Saints hian minute sawm chuang hret khelh a nihin goal an khung nghe nghe a, De Gea chuan Pogba pass-in Pogba hi a inveng tawk lova, Danny Ings chuan ball a chhuhsak, Ings hian Nathan Redmond pe in, Redmond hian Armstrong chu ball a pe ve leh, yard 6 vel atangin Armstrong hian goal a khunga, mikhual lam hma a hruaipui.
20mins-a United hian an si phurh an suta, Pogba chuan Martial ball a pe, Martial hian Rassford pe in, Rashford hian goal-ah a khung zuia, 1-1 a ni. Minute hnih hnuah United hian hma an hruai chhunzawma, Bruno Fernandes chuan box pawn veilamah Martial ball a pe a, Martial hian box chhung veilamah ball lalutin, a cut zeuha, goal-ah pet lutin, United hma a hruapui.
Southampton defence a khawng tha thawkhata, United hian an thiat hleithei lo. 70mins khelh a nih tepah, United hian goal an khung ngei tura ngaih a nih laiin, Rashford-a chance tha tak neih chu Bertrand chuan a lo block.
Hun tawp dawnah Saints chance tha tak neih chu De Gea chuan tha takin a lo save bawka, De Gea hian United tana a game 400 khelhnaah save pawimawh tak a nei. Hemi hnu hian United player Brandon Williams leh Saints fullback Walker-Peters te an intauha, anni hi intauh na hle in, khelmual chhungah buaipui an ni a, Walker-Peters hi khel chhunzawm leh thei mahse Williams erawh a bek a thi bawk nen lakchhuah a ngai.
United hian an substitution an hman zawh tawh avangin Williams a chhuah hnuah player 10-in an khela, minute nga pek belh a ni. Injury time-a minute rukna an khelhin, Saints hian corner an hmu a, corner atang hian Ward-Prowse chuan ball a vawrh lut, hei hi hnai set sawt atangin Obafemi chuan goal-ah a lo khungin, 2-2 in inkhel a tawp.
Manchester United 2-2 Southampton
(Rashford 20’, Martial 23’) (Armstrong 12’, Obafemi 90+6’)
Player Ratings
Man Utd: De Gea 6, Wan-Bissaka 5, Shaw 5, Maguire 5, Lindelof 6, Matic 6, Pogba 5, Fernandes 6, Martial 8, Greenwood 5, Rashford 7. Subs. Fred 5, Williams 4, McTominay 4
Southampton: McCarthy 6, Walker-Peters 5, Bertrand 6, Stephens 7, Bednarek 7, Romeu 6, Ward-Prowse 6, Redmond 7, Armstrong 7, Adams 5, Ings 6. Subs. Long 5, Smallbone 6, Obafemi 7