15 May 2019 01:04

bakteaJr.

Mizo tlangval

​United hnenah Real Madrid-in Navas an zuar

Real Madrid chuan an goalkeeper Keylor Navas chu Manchester United an zawrh niin English chanchinbu lar tar The Sun chuan a tarlang.

Navas hi kum 32 a lo tling chho ve tawh a, player kum upa lam a ni chho mek. Real Madrid hian Navas aia keeper naupang zawk Thibaut Courtois chu nikum nipui lai khan Chelsea atangin an lo lei tawh bawk nen, Navas zawk hi tihral mai an hreh lo niin a lang.

Real hian United hnen khera an goalkeeper an zawrh chhan hi Paul Pogba lakluh an duh vang niin The Sun chuan a tarlang bawk a, Real hian United chu Navas hmanga thlem lungawi an tum ni ber pawhin a ngaih theih.

Real manager Zinedine Zidane chuan Courtois hi a ngaina lutuk lo niin a lang mahse kum lamah Navas nen an lo inthlau ve bawka, Courtois hi thlang zawk mahse a awm lo hran lo.

Courtois hi chhuah tir leh mai a ni dawn anga sawi tam viau mahse thudik tak hriat a harsa a, hun rei zawk thlir chuan Navas aia Courtois kawl hi thil fuh zawk a nih hmel.

Manchester United goalkeeper David de Gea chu tun hnaiah a che fuh lutuk lova, mahse United manager Ole Gunnar Solskjaer chuan a thlavang a hauh fo.

Navas hi De gea nek chhuak tu a hmang kher lo pawhin De Gea-a’n hma a sawn theih nan pawh United hian an lakluh duh mai a rinawm a, kumin nipuiah hian Navas hi Premier League lamah a insuan lovang tih a sawi theih lo.

Real hian Navas an hralh chuan first-choice atan Courtois an hmang dawn nge, goalkeeper thar an melh dawn tih chu sawi theih a la ni lova, Zidane-a’n Courtois a ngainat lem loh avangin tun nipuiah Real hian goalkeeper thar an la lovang tih pawh a sawi theih loh ve bawk a ni.