Virgil van Dijk chuan Manchester United nen an inkhel chu Liverpool tana game pawimawh ber a nih loh thu a sawi.

Premier League hmahruaitu Liverpool chuan Pathianniah hian Old Trafford-ah Manchester United an luhchilh dawn a, point 8 a hma an hruaina chu belhchhah theih ngei an tum dawn a. Hetih lai hian United chuan an dinhmun fuh lo laklawh tak mai chu tihtawp an tum ve thung ang.

Liverpool hi tun season chhungin an che tha hle a, Premier League match 8 khelh tawhah an la chak kim vek a. Hmahruaitu an ni a, point 8 in an sang fal mek a. Hetih lai hian Manchester United ve thung chu 12-naah an awm mek a, point 2 chauhin relegation zone atangin an la him a ni.

Club pahnihte hi a hmain an lo intawng ve nual tawh a, an inkhelh hi chuan thawm pawh a nei viau thin a, inkhel hmuhnawm tak a ni deuh tlangpui bawk a. Heti chung hian Van Dijk chuan United an hmachhawn tur chu game lian tak nia a hriat loh thu hi a sawi a ni.

Van Dijk chuan, “Game lian tak chu a ni a, a bik takin club tantute tan a lian lehzual a. Hetih rual hian Manchester United hmachhawn ai chuan UEFA Champions League game zawng zawng hi a lian zawk vek a ni,” a ti.

“Inkhelh hma boruak a sang a, game dangte ai chuan eng eng emaw a tam zawk chiang a. Chuti chung chuan season khat chhunga game lian ber pawl chu a ni lo chiang,” a ti bawk.

A sawi zelnaah, “Game lian ber berte chu UEFA Champions League match te hi an ni a, Premier League title kan lak theihna tur game te pawh game lian chu an ni ang,” a ti.

“United hi an che fuh thei meuh rih lo a, an inrintawkna a tla hniam viau a, an duh angin an awm thei rih lo bawk a. Hetih lai hian football that ve na deuh chu chet chhiat a kal tluan viau lai pawhin kan inperh tho ve leh thei zel a ni,” a ti bawk.

Pathiannia an inkhelh hunah chuan Manchester United tan goalkeeper David de Gea leh midfielder Paul Pogba te chu an inlan theih hmel loh a ni.