Nani chuan Manchester United tan insiamthat viau a ngaih thu sawiin, Old Trafford-ah world-class player seng luh nual tul a tih thu a sawi.

Manchester United chuan 2012-13 khan Premier League title an la a, hei hi league title an lak theih hnuhnung ber niin, hemi tumah hian Portuguese star Nani pawh hi a la tel ve a ni.

Tun season chhungin Manchester United chu an che tha em em lo hle a, Premier League-ah parukna niin champion ta Manchester City aiin point 32 ngawtin an hniam zawk a. Season tharah UEFA Champions League an khel pha dawn lo a, Europa League lamah an inlan ang.

United hi tun hnaiah Ajax captain Matthijs de Ligt bakah Benfica player Joao Felix, Real Madrid lama tla na tawh lo Gareth Bale leh Paris Saint-Germain full-back Thomas Meunier te nen an sawi zawm mek a. Ole Gunnar Solskjaer chuan player siksawi nual a tum a, thil chiang erawh engmah a la awm lo thung.

Major League Soccer club Orlando City SC winger Nani chuan, “United hian tun aia thleng sang tur chuan player lar an lak luh nual a ngai. Tuna an kalphung te, an rilru put dan te hi an thlak danglam a ngai hle a, khelmuala an awm dan pawh tihdanglam a ngai hle a ni,” a ti.

“Sir Alex Ferguson kaihhruaina hnuaia kan awm thin lai kha ka la hre reng a, vawi tam tak chu khelh that loh tum kan nei ve thin a. Mahse, minute 15 hnu velah chuan kan inkhelh laiah khan kan thinlung zawng zawng kan pe a, goal thun ngei tumin beihpui kan thlak thin,” a ti bawk.

A sawi zelnaah, “Thahnemngai takin kan inkhel a, ball kan um a, theihtawp kan chhuah a, a tawpah chuan kan hlawhtlin phah fo reng a. Tuna United player te pawh hian chak duhna thinlung an put nasat a ngai a, ball chang tamtu nih tumin khelmuala dingchang zawk nih an tum viau a tul a ni,” a ti.

United tana a khelh laiin Nani hian Premier League title vawi li a lak bakah UEFA Champions League title pawh a la a, 2015 khan hmun dang panin a kal chhuak a ni.