Gary Neville chuan Ole Gunnar Solskjaer hnuaiah kal dan tur dik taka an kal chho zel a nih phawt chuan Old Trafford-ah kum nga chhung chuan trophy an hawn theih tur thu a sawi.
Manchester United captain hlui Gary Neville chuan Ole Gunnar Solskjaer hnuaia an club kalphung nghet anga an kal chho leh thei a nih phawt chuan trophy an lak hun chu dawhthei taka nghah a inhuam thu a sawi a. Neville hian club kal dan a dik phawt chuan trophy la tur hian kum nga aia rei an nghah a ngaih a rin loh thu a sawi a ni.
United chuan 2013 a Sir Alex Ferguson a chawlh hnuah Premier League title an la leh ta miah lo a. Hun rei tak chu league title beisei tawh mahse Neville chuan kum nga dang pawh nghah a la inhuam thu hi a sawi chhuak a ni.
Neville chuan, “Rilru put hmang a dik hmasak a ngai a, khelmualah football hmuhnawm tak entir thei bawk se, player lak luh kawngah club tana tha tur zel lei thin se, a theih anga tam chak tum bawk se. Hei bakah hian tlawm duh lohna thinlung pu se, tumruhna nen theihtawp chhuah zel se, chutianga an ti thei a nih ngat chuan kum hnih atanga kum nga thleng pawh trophy la tur hian ka nghak peih,” a ti.
“Manchester United hian tuna an manager hnuaiah hma thar la se, an hlawhtlin hun nghah chu ka tan harsatna a awm hauh lo ang. A hma pawhin an hlawhtlin hun nghakin kum 20 vel ka lo tan tawh a, tunah pawh chutianga nghah chu ka la inhuam hle a ni,” a ti bawk.
A sawi zelnaah, “Hlawhtling tur hian ka hmanhmawh vut vut hran lo a, thil nih dan tur dik taka a kal chhoh hi ka duh a, Ole hian engkim a hre chiang a, a kaihhruaina hnuaiah kawng dik an zawh chhoh theih hi ka ring tlat a ni,” a ti.
Ole Gunnar Solskjaer chuan nipui transfer window-ah chuan player a lei thar ngei a rinawm a, a lo berah an squad siksawi nan player panga vel tal chu lei tura ngaih a ni a. Tun hnaia an sawi dan chuan British player la naupang tak takte chu Solskjaer hian a melh kual a, Swansea winger Daniel James, Newcastle midfielder Sean Longstaff leh Crystal Palace full-back Aaron Wan-Bissaka te chu an enthlak deuhte niin an sawi.
Solskjaer chuan player lei tur a dapnaah man to deuh hlek chu a melh lo hle a, a hmaa manager Jose Mourinho nen an kalphung a inang dawn lo hle a. Portuguese manager kha chuan man to tak takin player a lei khawm a, Norwegian boss erawh chuan player naupang tak, man tlawm taka lei tur a melh thung a ni.